मनिला – फिलिपिन्सको मध्यभागीय प्रान्त सेबु नजिक मंगलबार राति आएको ६.९ म्याग्निच्युडको शक्तिशाली भूकम्पमा कम्तीमा ६० जनाको मृत्यु भएको छ भने करिब १५० जना घाइते भएका छन्।

अमेरिकी भूगर्भीय सर्वेक्षणका अनुसार स्थानीय समय अनुसार राति ९:५९ बजे सेबु टापुको उत्तरी भाग बोगो शहर नजिक केन्द्रबिन्दु भएर भूकम्प गएको थियो। करिब ९० हजार जनसंख्या भएको उक्त शहर वरपर ५ भन्दा माथिको तीव्रता भएका चारवटा पराकम्पन पनि गएका थिए।

फिलिपिन्सको राष्ट्रिय विपद् जोखिम न्यूनीकरण तथा व्यवस्थापन परिषद् का अनुसार बुधबार बिहानसम्म ६० मृतक, १४७ घाइते र २२ भवन क्षतिग्रस्त भएको तथ्याङ्क सार्वजनिक भएको छ। स्थानीय प्रशासनले सेबुका केही क्षेत्रमा “आपतकालीन अवस्था” घोषणा गरेको छ।

भूकम्पका कारण विद्युत आपूर्ति अवरुद्ध भएको छ भने सय वर्षभन्दा पुरानो एउटा चर्चसमेत भत्किएको छ। फिलिपिन्स भूकम्पविद् तथा ज्वालामुखी संस्थानले सेबु, लेयटे र बिलिरानका बासिन्दालाई समुद्रतटबाट टाढा रहन र असामान्य लहरका लागि सतर्क रहन आग्रह गरेको छ।

फिलिपिन्समा सन् २०२२ को जुलाईमा गएको ७.० म्याग्निच्युडको भूकम्पमा कम्तीमा ५ जनाको मृत्यु र ६० जना घाइते भएका थिए।