७० वर्षे उमेर हद मान्नुछ भने मानेर बिदा लिए हुन्छ

काठमाडौँ- नेकपा एमालेको दुई दिनको पोलिटब्युरो बैठकमा ३ वटा कुराहरु मुख्य चर्चाको विषयको रुपमा रहे।

पहिलो विषय थियो ७० वर्षे उमेर हद दोश्रो एउटै पदमा २ कार्यकाल रहने सक्ने व्यवस्था र तेश्रो पुर्व राष्ट्रपति भण्डारीको सदस्यता नवीकरणको विषय।

तेश्रो विषय, पुर्व राष्ट्रपति भण्डारीको सदस्यता नवीकरणको विषय ओली र भण्डारीबीच भएको भेटवार्ता लगतै भण्डारीले मेरो सदस्यता नवीकरण भैसकेको छ भन्ने अभिव्यक्ति सञ्चार माध्यममा दिएसंगै त्यो विषय केहि मत्थर बनेको छ। यधपी आगामी विधान महाधिवेशनले त्यस विषयमा के कस्ता निर्णय गर्छ भन्ने कुरा भने अझै चासोको विषय बनेको छ।

दोश्रो एउटै पदमा २ कार्यकाल रहने व्यवस्थामा पनि सायद विधान महाधिवेशनले टुंगो लगाउने नै छ। यधपी के कसरि सो विषको टुङ्गो लाग्नेछ त्यो भने अझै तुरुन्तै निर्क्यौल गर्न सकिने अवस्था छैन। त्यसो त ओलीले एउटै पदमा २ कार्यकाल रहने व्यवस्थामा पनि आफ्नो अडान कायमै राखेका छन्।

त्यसैगरी, ७० वर्षे उमेर हदको विषयमा भने, अध्यक्ष ओलीले आफु कामको हिसाबले अझै ५० वर्ष जस्तो खटिरहेको छु भन्दै सो उमेर हद नमान्ने अडान लिएका छन्।

७० वर्षे उमेर हद मान्नु पर्छ भन्ने विषय बैठकमा चलिरहदा उनले, ” को-कसलाई ७० वर्षे उमेर हद मान्नुछ माने हुन्छ र विदा लिए हुन्छ,” भनेर जवाफ दिएका थिए ।

१४ वर्ष जेल बस्दा काम गर्न नपाएको भन्दै, ७० वर्षे उमेर हद लागू गर्ने हो भने आफूले १४ वर्ष जेल बसेको घटाउनुपर्ने ओलीले तर्क गरेका थिए । पार्टीमा अझै पनि आफ्नो भूमिका अपरिहार्य देखेकोले ७० वर्षे उमेर हद हटाउने प्रावधान आफैले अगाडी बढाएको समेत उनले बताएका थिए।