काठमाडौं – राष्ट्रपति रामचन्द्र पौडेलले संविधान दिवसले दिगो शान्ति, सुशासन, विकास र समृद्धिको लक्ष्य हासिल गर्न सबै नेपालीलाई एकजुट हुने प्रेरणा दिने विश्वास व्यक्त गरेका छन्।

संविधान दिवसको सन्देशमा उनले संविधानको मर्मलाई व्यवहारमा उतार्न इमान्दार र प्रभावकारी प्रयास गर्न सबैलाई आग्रह गरेका छन् ।

राष्ट्रपतिले संविधानले सामाजिक न्यायमा आधारित समानतामूलक समाज र समाजवाद उन्मुख अर्थतन्त्र निर्माण गर्ने लक्ष्य लिएको उल्लेख गर्दै विभेद र उत्पीडन अन्त्य गरी विविधतायुक्त नेपाली समाजलाई राष्ट्रिय एकतामा बाँधेको बताए।

उनले सबै नागरिकलाई राज्यका सेवा–सुविधामा समान पहुँच र सामाजिक सुरक्षा सुनिश्चित गर्नुपर्नेमा जोड दिए। साथै, सुशासनमार्फत जलस्रोत र ऊर्जा व्यवस्थापन गर्न सके नेपाल छिट्टै समुन्नत राष्ट्र बन्न सक्ने विश्वास व्यक्त गरेका छन् ।