बैंकक – क्याम्बोडियाका नेता हुन सेनसँगको गरेको गोप्य टेलिफोन वार्ता सार्वजनिक भएको घटनामा आचारसंहिता उल्लंघन गरेको ठहर गर्दै थाइल्यान्डको संवैधानिक अदालतले प्रधानमन्त्री पैटोंग्तार्न शिनावात्रालाई पदबाट हटाएको छ।

गत जुन महिनामा भएको उक्त वार्तामा उनले हुन सेनलाई “काका” भनेर सम्बोधन गर्दै थाई सेनाको आलोचना गरेकी थिइन्, जुन बेला थाइल्यान्ड–क्याम्बोडिया सीमा तनाव बढ्दै गइरहेको थियो।

अदालतले उनको अभिव्यक्तिले क्याम्बोडियाको हितसँग व्यक्तिगत सम्बन्ध देखाएको भन्दै थाइल्यान्डको पक्षमा उनको निष्ठा शंका योग्य भएको टिप्पणी गर्दै पदबाट हटाएको हो । नौजना न्यायाधीशमध्ये ६ जनाले उनको विरुद्ध र तीन जनाले समर्थनमा मतदान गरेका थिए। अदालतले उनको कार्यलाई प्रधानमन्त्रीको पद अनुसारको अपेक्षित नैतिक मापदण्डविपरीत ठहर गरेको हो।

पूर्व प्रधानमन्त्री थाक्सिन शिनावात्राकी छोरी पैटोंग्तार्न २००८ पछि अदालतद्वारा पदबाट हटाइएको पाँचौँ थाई नेता र शिनावात्रा परिवारबाट पदच्युत हुने तेस्रो नेता हुन्। उनले भने, आफूले हिंसा रोक्न प्रयास गर्ने क्रममा यस्तो कदम चालेको दाबी गरेकी थिइन् । तर केही हप्तापछि पाँच दिन लामो सशस्त्र झडप भई दर्जनौंको मृत्यु भएको र लाखौं विस्थापित हुन पुगेका थिए।

स्रेत्था थाभिसिन पदमुक्त भएपछि प्रधानमन्त्री बनेकी पैटोंग्तार्न केही महिनामै पदच्युत भएकी हुन्। उनको पदच्युत भएपछि कन्जर्भेटिभ भूमजाइथाइ पार्टीले आफ्ना नेतृ अनुतिन चार्नवीराकुलको नेतृत्वमा नयाँ सरकार बनाउन पर्याप्त समर्थन जुटाएको घोषणा गरेको छ।

थाई राजनीतिमा दशकौंदेखि प्रभावशाली शिनावात्रा परिवारका लागि यो अर्को ठूलो धक्का हो। यस घटनाले उनीहरूको भविष्यको राजनीतिक प्रभावबारे नयाँ प्रश्न उठाएको छ।