काठमाडौं – प्रधानमन्त्री केपी शर्मा ओलीले सत्ता सहयात्री दल नेपाली कांग्रेसबाट आफूले पूरा सहयोग प्राप्त गरिरहेको भन्दै आफुले पनि काँग्रेस नेतृत्वको सरकारलाई पूर्ण रुपमा सहयोग गर्ने बताएका छन्।

भक्तपुरको सूर्यविनायक नगरपालिकाको प्रमुख प्रशासकीय भवन उद्घाटन समारोहलाई सम्बोधन गर्दै उनले भने, “अब १७/१८ महिनापछि शेरबहादुरजी प्रधानमन्त्री हुनुहुन्छ । उहाँले चलाउनुहुन्छ । मैले सहयोग गर्छु । नेकपा एमालले पूराका पूरा सहयोग गर्छ र सफल बनाउँछौं”।

अहिले मैले नेपाली कांग्रेसबाट साथ पाएको छु । कुनै रिजर्भेसनबिना पूराका पूरा साथ पाएको छु । भोलि नेपाली कांग्रेसले हामीबाट पूराका पूरा साथ पाउँछ भन्दै प्रमुख दलहरू मिलेर सरकार चलाउँदा पनि मुलुकले विकासको बाटो लिन नसके अरु विकल्प नहुने बताएका छन्।

आफुहरुले ७ सय ५३ वटा पालिकामा विकास गरेर देखाउने र कसैले पनि यो विकासको गतिलाई रोक्न चाहेर पनि नसक्ने उनले बताएका छन्।