वासिङ्टन – अमेरिकाका राष्ट्रपति डोनाल्ड ट्रम्पले युक्रेन युद्ध अब तेस्रो विश्वयुद्धमा परिणत हुने खतरा नभएको घोषणा गरेका छन्।

बुधबार प्रशारीत एक पोडकास्टमा ट्रम्पले भने, “आफुले पदभार ग्रहण गर्दा युद्ध भयावह रूपमा चलिरहेको र तेस्रो विश्वयुद्धतर्फ गइरहेको देखिएको थियो,तर अब यस्तो चिन्ता नगर्नुपर्ने बताए।”

ट्रम्पले पूर्व राष्ट्रपति जो बाइडेनलाई दोष लगाउँदै, युक्रेनलाई नाटोमा ल्याउने प्रयासमार्फत रूसलाई उत्तेजित गरी संघर्ष चर्काएको आरोप समेत लगाए। आफु पदमा फर्किएपछि उनले मस्कोसँग उच्चस्तरीय वार्ता सुरु गरेका छन् , र गत हप्तामात्र अलास्कामा राष्ट्रपति भ्लादिमिर पुटिनसँग प्रत्यक्ष भेट गरेका थिए । उनले उक्त वार्तालाई अत्यन्तै फलदायी भनेका थिए ।

त्यस लगत्तै उनले युक्रेनका राष्ट्रपति भोलोडिमिर जेलेन्स्की र केही युरोपेली नेताहरू सँग वार्ता गरेका थिए। ह्वाइट हाउसले अहिले “टनलको अन्त्यमा प्रकाश देखिएको” र दिगो शान्तिको वास्तविक सम्भावना रहेको जनाएको छ, यद्यपि यसमा समय लाग्ने बताइएको छ।

रूसले लामो समयदेखि नाटोलाई युद्धको आरोप लगाउँदै आएको छ। तर पुटिनसहितका रुसी अधिकारीहरूले ट्रम्पको शान्ति वार्ताको प्रयासलाई स्वागत गर्दै उनको तारिफ समेत गरेका छन् ।