काठमाडौँ – जेन–जी आन्दोलनका क्रममा भएको आगजनीले काठमाडौँ जिल्ला प्रशासन कार्यालयका महत्त्वपूर्ण कागजात जलेर नष्ट भएको सहायक प्रमुख जिल्ला अधिकारी मुक्तिराम रिजालले बताएका छन् ।

आगलागीमा नागरिकता, राहदानी, मुद्दा र संस्थासम्बन्धी अभिलेखमा क्षति पुगेको छ भने वितरणका लागि तयार करिब डेढ लाख राष्ट्रिय परिचयपत्र खरानी भएका छन्। साथै, वि.सं. २०२५ देखि रहेका नागरिकताको अभिलेख पनि जलेका छन्।

संस्थागत अभिलेख, उजुरी र मिसिलहरू समेत क्षतिग्रस्त भएका छन्। यद्यपि, कार्यालयले आफ्ना सेवा फेरि सञ्चालनमा ल्याएको छ। नागरिकता, नाबालक परिचयपत्र, प्रतिलिपि नागरिकता सिफारिस लगायतका सेवा पुनः सुरु गरिएको कार्यालयले जनाएको छ।