“जेन जी” लाइ बदनाम नगरियोस:”जेन जी” को नाममा राजनीतिक रोटी सेक्नेहरु सल्बलाय !

“जेन जी ” पुस्ताले भ्रष्टाचार विरुद्द सुरु गरेको शान्तिपूर्ण आन्दोलनमा ३० जना अवोध र निर्दोष नागरिकले ज्यान गुमाए भने १००० भन्दा बढी घाइते भए। उनीहरु निस्पक्ष र स्वतन्त्र रुपमा सरकारलाई खबरदारी गर्न शान्तिपूर्ण तरिकाले सडकमा उत्रिंदै गर्दा , “जेन जी ” को आडमा विभिन्न अराजक समुह र राजनितिक दलसम्बद्ध संस्थाका युवा नेता भनिनेहरुको पनि बाक्लै सहभागिता देखियो। त्यसो त “जेन जी” हरुले नै आफ्नो शान्तिपूर्ण आन्दोलनमा घुसपैठ भएकोबारे आन्दोलनकै समयमा पनि त्यहा उपस्थित प्रहरीलाई खबर गरेका थिए भन्ने कुराहरु जानकारीमा आएको छ र आन्दोलनको साँझ उनीहरुले यो कुरा आफ्नो सामाजिक सञ्जाल मार्फत सार्वजनिक पनि गरे ।

आन्दोलनको क्रममा सरकारले ति अवोध “जेन जी” हरुको माग सम्बोधन गर्नु त कता कता उनीहरुलाई राज्यको शत्रु जस्तो व्यवहार गरेर उनीहरुमाथि अन्धाधुन्ध गोलि वर्षायो। जेन जी युवाहरुको हत्याको विरोधमा दोश्रो दिनको प्रदर्शन मा “जेन जी” संगै उनीहरुको आफन्त घर परिवार साथि भाई सबैजना उनीहरुको समर्थन गर्दै र सरकारको तानासाही र हत्यारा रवैया प्रति खुलेरै विरोधमा उत्रिए। आन्दोलन “जेन जी” पुस्ताले नै सुरु गर्यो , त्यसमा कुनै सन्देह छैन , तर जब अवोध र निर्दोष “जेन जी ” पुस्तामाथि गोलि दागेर उनीहरुको हत्या गर्न सरकार तम्सियो त्यसको विरोधमा सबै नेपाली सडकमा उत्रिए। त्यसपछि संसद भवन र सिहँदरबार देखि राष्ट्रपति भवन हुँदै भ्रष्ट नेताको घर सम्म जले। नेताको घर जले, त्यसमा अवसोच लाग्नुपर्ने र दुख मनाउ गर्नुपर्ने केहि छैन। “जे भयो ठिकै भयो , निर्दोष नेपालीको हत्या गर्ने अपराधी सरकार र तिनका नेताहरुलाई यो सजाय नै भयो ” भन्ने आम जनताको धारणा सामाजिक सञ्जालभरि आज पनि देख्न सकिन्छ। सिंहदरबार जल्दा र प्रशासन कार्यालय जल्दा र अदालात जल्दा पनि आम नागरिकको धारणा , “भ्रष्टाचार र वेथितिको अड्डा जलेको हो , यो ढुङ्गा माटोको संरचना हामि त्यहिँ खरानीबाट माथि उठेर बनाउला” भन्ने जोश उनीहरुमा देखियो। हुन् पनि हो , जब छोराछोरीको रगत बग्छ, आमाबुबाको आँसु बग्छ, तब कुनै पनि महल र कुर्सीको मूल्य शून्य हुन्छ । त्यो पीडाको आँशु र रगतको चित्कार ले न्याय माग्छ। त्यहि न्यायको खातीर लड्दै गर्दा दुई चार वटा राज्यका सम्पति जल्न पुगे।

तर सवैले अवासोच मानेको कुरा त्यहाँ भएका दस्तावेज, हाम्रो इतिहास र विभिन्न घटनाको प्रमाण जल्नु थियो। भवन जलेको विस्मात भन्दा त्यहा भएका महत्वपूर्ण दस्तावेज जलेकोमा सिङ्गो “जेन जी” पुस्ता र आम नागरिक चिन्तित बन्न पुग्यो। त्यहि विषयमा सामाजिक सञ्जालमा “जेन जी” पुस्ताका सबैले दुख मनाउ गर्दै लेखे, “सार्वजनिक सम्पतिको तोडफोड र आगजनी गर्ने हाम्रो उदेश्य थिएन र यो कार्य हामि बाट भएको पनि होइन। हाम्रो आन्दोलनमा घुसपैठ भयो भनेर हामीले भन्दै आएका छौँ र उनिहरुबाट नै यो कार्य भएको हुन सक्छ। ” “जेन जी” को नाममा घुस पैठ गरेका अराजक समुहले गरेको तोडफोड र आगजनी बाट आन्दोलन गलत दिशातर्फ जाँदैछ र आफ्नो नाममा स्वार्थी समुहहरुले अराजकता फैलाउन थालेको बुझेका “जेन जी ” पुस्ताका भाइ-बहिनीहरु पछि आफैँ पुरातत्व विभाग अगाडी घेरा हालेर संस्कृति र इतिहास बचाउ भन्दै पुरातत्व विभाग बचाउन लागेको दृश्यहरु पनि हामी सामाजिक सञ्जालमा आज पनि देख्न सक्छौं। यसबाट प्रष्ट हुन् जान्छ कि “जेन जी ” पुस्ताको आडमा स्वार्थि समुहहरुले सार्वजनिक र निजि सम्पति ध्वस्त पार्ने , बैंक लुट्ने ,अड्डा अदालतबाट प्रमाण नष्ट गर्ने, सिंहदरबारको महत्वपूर्ण दस्तावेज र इतिहास नामेट पार्ने देखि कारगारबाट अपराधि भगाउने सम्मको कुकृत्य गरे। यो सबै “जेन जी” पुस्ताको नाममा गरिएको अपराध र सिंगो “जेन जी” पुस्तालाई बदनाम गरेर आफ्नो स्वार्थ पुरा गर्ने अराजक समुहको चाल मात्र थियो।

“जेन जी” को आन्दोलन पछि सरकार ढल्यो र जनता मार्ने हत्याराहरुको भागाभाग भयो। प्रहरी देखि नेतासम्म कुटिए। देश पूर्ण रुपमा आक्रान्त बन्यो। दोश्रो दिन राति १० बजेपछी नेपाली सेनाले देशको सुरक्षाको नेतृत्व गर्दै “जेन जी” पुस्तालाई वार्तामा आउन आग्रह गर्यो। सेना र राष्ट्रपतिले वार्तामा आउन गरेको आग्रह संगै फेरी “जेन जी” को खोल ओढेर विभिन्न स्वार्थ समूहहरु आफ्नो स्वार्थको रोटी सेक्न सक्रीए भएका छन्। आफुलाई “जेन जी ” भनेर वार्ता गर्न ४-५ वटै समूह अगाडी देखिए र कतिसम्म भने ति सबैले आफुलाई नै असली “जेन जी ” भन्दै जंगी अड्डा अगाडी आ-आँफै लड्न थाले। यो कुरा नेपाली सेनाले पक्कै पनि बुझेको छ तर कलिलो “जेन जी” पुस्ताले यो कुरा बुझ्नु जरुरि छ। किनकि कुनै एउटा ठोस नेतृत्व विना “जेन जी” ले सुरु गरेको आन्दोलनमा आज “जेन जी” को नेतृत्वकर्ता हुँ भनेर वार्तामा देखिएका कतिपय अनुहारहरु विभिन्न राजनीतिक शक्ति र स्वार्थ समुहबाट परिचालित देखिन्छन। आज आफुलाई “जेन जी ” भनेर वार्ताको अगुवाई गर्न अगाडी सरेकाहरु “जेन जी ” नभएर विभिन्न राजनीतिक दल र तिनका भातृ संगठनका कार्यकर्ताहरु भएको देखिएको छ। त्यसैले “जेन जी ” भाइ- बहिनीहरु सचेत हुनुपर्ने देखिन्छ। तिमीहरुको आँशु र रगत अनि तिमीहरुको साथि भाइको बलिदान व्यर्थै खेर जान दिनुहुँदैन। तिमीहरुको नाममा “जेन जी ” को खोल ओढेर आफ्नो स्वार्थको रोटि सेक्न खोज्नेहरुबाट तिमीहरुले जे कुराको लागि आन्दोलनको सुरुवात गरेर आफ्नो ज्यानको आहुति दिन सम्म पछि परेनौ त्यो पुरा हुनेछैन। “जेन जी ” को खोल ओढेका राजनीतिक दल र तिनका भातृ संगठनका कार्यकर्ताहरु र स्वार्थि समूहहरुलाई चिनेर तिनीहरुलाई बहिष्कार गर र तिनिहरुलाई तिम्रो नाममा राजनीति गर्न नदेउ।