बाँके- बाँके जानकी गाउंपालिका थरुवान्पुर पिपरामा मृत भेटिएका २१ वर्षीय मुकेश पाशिको मृत्युको घटनामा अनुसन्धान गर्ने क्रममा पक्राउ परेका बाजुरा बुढीनन्दा नगरपालिका १० का बिरेन्द्र बहादुर सिंहको प्रहरी हिरासतमा मृत्यु भएको आरोप लगाउंदै सिंहको परिवारले उक्त घटनामा अनुसन्धान हुनुपर्ने माग गरेको छ।

प्रहरी अनुसन्धानको क्रममा भाद्र २० गते पक्राउ परेका सिंहको परिवार , उनको श्रीमती, छोरि र भतिजी सिंहलाई इलाका प्रहरी कार्यालय बाँकेमा भेट्न जाँदा समेत सिंहले आफुलाई प्रहरीले कुटपिट गरेको भन्दै शरीरमा रहेको निलडाम देखाएको र आफुलाई प्रहरीले मार्छन कि के हो भनेर जानकारी समेत गराएको उनीहरुले बताएका छन्। परिवारको अनुसार सिंहलाई प्रहरीले २३ गते बिहान ४ बजे कोहोलपुर मेडिकल कलेजमा लगेको र निजको श्रीमतीलाई तपाइको श्रीमान बिरामी छ भनेर भेट्न बोलाएको तर अस्पतालका कर्मचारीसँग बुझ्दा प्रहरीले मरेको लाश अस्पतालमा ल्याएको र कुटपिट बाट मृत्यु भएको जानकारी दिएको उनले बताएकी छन। सिंहका आफन्तले प्रहरीले उनलाई बिना पुर्जी पक्राउ गरेर चार दिनसम्म बिनामुद्दा हिरासतमा राखेर जबर्जस्ति कुटपिट गर्दा निजको मृत्यु भएको आरोप लगाएको छ।

यधपी, जिल्ला प्रहरी बाँकेका डीएसपी दिपक पातलिसंग हामीले सम्पर्क गर्दा , सिंहको मृत्यु प्रहरीको कुटपिटबाट नभएको र अस्पतालमा उपचारको क्रममा नै उनको मृत्यु भएको उनले बताएका छन्। प्रहरीले कुटेर हिरासतमानै मृत्यु भएको भन्ने कुरा निराधार रहेको र त्यसमा प्रहरीले अनुसन्धान गर्ने पनि उनले बताएका छन्।