अनिवार्य खोपको विरोधमा उत्रिएका क्यानडाका ट्रक चालकहरुले आफ्नो माग पुरा नभएसम्म प्रदर्शन जारी राख्ने बताएका छन्।

सीमा पार गर्नु अघि ट्रक चालकहरूलाई पूर्ण रूपमा खोप लगाउन आवश्यक पर्ने नियमको विरोध गर्दै क्यानडामा सुरु भएको ट्रक चालकहरुको सरकार विरोधी प्रदर्शनले उग्र रुप लिएको छ। प्रदर्शन उग्र बन्दै गएपछि ओन्टारियो प्रमुख डग फोर्डले शुक्रबार आपतकालिन अवस्थाको घोषणा गरेका थिए ।

पत्रकार सम्मेलनमा बोल्दै फोर्डले प्रदर्शनकारीहरूलाई शान्तिपूर्ण रूपमा नाकाबन्दी अन्त्य गर्न आग्रह समेत गरेका छन्। तर यता केही प्रदर्शनकारीहरूले भने सेप्टेम्बरको तेस्रो जनादेशबाट निर्वाचित प्रधानमन्त्री जस्टिन ट्रुडोलाई हटाउन माग गरिरहेका छन्। प्रदर्शनकारीहरूले अमेरिकासंगको तीनवटा सीमा नाका र अन्य ठूला सडक र पुलहरू बन्द गरिदिएका छन्। स्थितिलाई नियन्त्रणमा लिन सो क्षेत्रमा आपतकालीन अवस्थाको घोषणा गरिएको भएपनि प्रदर्शनकारिहरुले त्यसको अवज्ञा गर्दै प्रदर्शन गरिरहेका छन्। आफ्नो माग पुरा नभएसम्म प्रदर्शन जारि राख्ने पनि उनीहरुले बताएका छन्।