असार २५,काठमाडौँ- प्रधानमन्त्रीको आपत्तिजनक अभिव्यक्तिलाई लिएर केहि दिन यता निरन्तर अवरुद्द संसद बैठक आज सुचारु भएको छ। प्रधानमन्त्रीले आफ्नो अभिव्यक्तिका विषयमा आत्मालोचना गर्ने र त्यसपछि प्रधानमन्त्रीको सचिवालयबाट सार्वजनिक वक्तव्यप्रति दुख व्यक्त गर्ने सहमतिपछि एमाले संसदको अवरोध खुलाउन तयार भएको हो।

आज सुचारु भएको संसद बैठकमा विवादित अभिव्यक्तिबारे स्पष्टीकरण दिँदै प्रधानमन्त्री प्रचण्डले, प्रधानमन्त्रीको हैसियतभन्दा पनि छोरी(ज्ञानु)को बुबाको रुपमा भावनात्मक भएर बोल्न पुगेको बताएका छन्। यो बहसले भविष्यमा सतर्क हुन उत्प्रेरित गरेको समेत उनले बताएका छन्।

आफ्नो विवादास्पद अभिव्यक्तिपछि संसदमा उठेका प्रश्न तथा टिप्पणीको स्पष्टीकरणका लागि पहिले नै तयार भए पनि मौका नदिइएको समेत उनले बताएका छन् । प्रतिपक्षी दलले राजीनामा नआएसम्म संसद चल्न नदिने अडान लिएको कुराप्रति आपत्ति जनाउँदै, के यही यो संसदीय अभ्यास ? एकचोटि मैले यो सदनसमक्ष भन्न पाउनुपर्दैन ? किन तीन दिनसम्म सदन अवरुद्ध गरियो ?, के प्रतिपक्षले राजीनामा माग्ने बित्तिकै राजीनामा दिइहाल्नुपर्ने हो ?, यही हो हामीले मान्दै आएको लोकतान्त्रिक पद्धति ? भन्दै संसदमा उनले आफ्नो प्रश्नहरु समेत राखेका छन् ।

साथै, उनले आफू पहिल्यै दुई पटक प्रधानमन्त्री भइसकेको र तेस्रो पटक परिस्थितिवश मलाई प्रधानमन्त्री बन्नुपर्ने परिस्थिति आइलागेको बताउँदै, आफु लामो समयका लागि प्रधानमन्त्री बन्नेमा विश्वास नरहेको समेत बताएका छन् ।

यता, राजेन्द्र लिङ्देनले भने प्रधानमन्त्री पुष्पकमल दाहाल ‘प्रचण्ड’ले नैतिकताका आधारमा राजीनामा दिनुपर्ने बताएका छन्। राजीनामा दिने नदिने हाम्रो दवावको विषय होइन भन्दै,तत्कालीन कानुन मन्त्री शेरबहादुर तामाङको राजीनामाको घटनालाई स्मरण गराउंदै, प्रधानमन्त्रीले नैतिकताका आधारमा राजीनामा दिनुपर्ने उनले बताएका छन्।

त्यसैगरी, नेकपा एमाले सांसद गोकुल बास्कोटले भने, ‘प्रधानमन्त्रीज्यु, तपाईँले तिरंगा झन्डा उचाल्ने हो कि चन्द्र सूर्य उचाल्ने हो? भनेर प्रश्न गरेका छन् ?
बास्कोटाले एमाले कांग्रेस रहे पनि नरहे पनि यो देश र यो देशको सार्वभौमसत्ता रहनुपर्ने भन्दै द्वन्दकालमा विभिन्न ४० बुँदे माग राखेर आन्दोलन गरे पनि अहिले त्यही ट्रक चढेको र भारतलाई कठपुतली भनेर आरोप लगाए पनि अहिले कम्फर्टेवल भएको आरोप लगाएका छन् ।