श्रावण २५,काठमाडौँ- जनजाति समुदायको आन्दोलनमा टेकु प्रहरीले गरेको दमन र हिरासतमा कुटपिट गरेको घटनालाई लिएर सरकारले छानबिन समिति गठन गरेको छ ।

अधिवक्ता भगवती पाण्डेले तामाङ, मगर र मुस्लिम समुदायको विवाह संस्कारबारे दिएको विवादास्पद अभिव्यक्तिविरुद्ध आन्दोलनमा उत्रिएका तामाङ र मगर समुदायका अगुवाहरूलाई प्रहरीले नियन्त्रणमा लिएर निर्घात कुटपिट गरेको भन्दै प्रहरीको कडा आलोचना भएको थियो ।

उक्त घटनाबारे छानबिन गर्न सरकारले गृह मन्त्रालयका उपसचिव रामबहादुर शाहीको संयोजकत्वमा पाँच सदस्यीय समिति गठन गर्दै सत्यतथ्य छानबिन गरी प्रतिवेदन पेस गर्न १० दिनको म्याद दिएको छ।

आन्दोलनको क्रममा प्रहरीले अनावश्यक बल प्रयोग गरेको र तीन दर्जनभन्दा बढीलाई नियन्त्रणमा लिएर हिरासतमै चरम यातना दिएको भन्दै प्रहरी विरुद्द छानबिन समिति गठन गरिएको हो।