काठमाडौँ- भिजिट भिसा प्रकरणमा संसदीय विशेष छानबिन समिति वा उच्चस्तरीय न्यायिक छानबिन समिति नबनेकोमा विरोध गर्दै राष्ट्रिय स्वतन्त्र पार्टी (रास्वपा) र राष्ट्रिय प्रजातन्त्र पार्टी (राप्रपा)ले मंगलबारको प्रतिनिधिसभा बैठक बहिष्कार गरेका छन्।

सभामुख देवराज घिमिरेले बैठक सुरु भएको घोषणा गरेलगत्तै दुवै दलका सांसदहरूले उठेर विरोध जनाए। रास्वपाका शिशिर खनालले मन्त्रिपरिषद् सदस्यहरू विभिन्न काण्डमा मुछिएको आरोप लगाउँदै तत्काल छानबिन समिति गठन गर्न माग गरे।

राप्रपाकी विना लामाले पनि भिजिट भिसा प्रकरणमा समिति गठन नभएसम्म विरोध जारी रहने बताउँदै, बहिष्कार गर्ने दिनको भत्ता समेत नलिने घोषणा गरिन्।

उनको वक्तव्यपछि दुवै दलका सांसदहरू बैठक कक्षबाट बाहिरिएका थिए।