काठमाडौँ- नेकपा एमालेका उपाध्यक्ष एवं पूर्व सभामुख सुवासचन्द्र नेम्बाङको आज राजकीय सम्मानसहित अन्त्येष्टि गरिने भएको छ । बिहान ११ बजे निजी निवास बालुवाटारबाट शवयात्रासहित पशुपति आर्यघाटमा नेम्वाङको पार्थिव शरीरलाई राजकीय सम्मानसहित अन्त्येष्टि गरिने भएको छ ।

नेम्वाङको शवयात्राका लागि बालुवाटारस्थित निवासदेखि शिक्षण अस्पताल, महाराजगन्ज–नारायणगोपाल चोक–धुम्बाराही–चाबहिल–गौशाला हुँदै पशुपति आर्यघाटसम्मको रुट तय गरिएको एमाले केन्द्रीय प्रचार विभागले जनाएको छ ।

श्रद्धाञ्जली अर्पणका लागि बुधबार दिउँसो १ बजेसम्म एमाले पार्टी कार्यालय च्यासलमा राखिएको नेम्वाङको पार्थीव शरीर श्रद्धाञ्जली पछि बालुवाटारस्थित निजी निवासमा राखिएको छ ।

नेम्वाङको निधनमा शोक प्रस्ताव पारित गर्न बिहीबार ३ बजेलाई अर्काे बैठक तोकिएको छ  भने यसअघि मन्त्रिपरिषद बैठकले हृदयघातबाट स्वर्गीय भएका नेम्वाङको पार्थिव शरीरलाई राजकीय सम्मानसहित अन्त्येष्टि गर्ने निर्णय गरेको थियो।