मस्कोले, रुसलाई फसाउन युक्रेनले परमाणु बम प्रयोग गर्ने कथित योजनाबारे पश्चिमलाई चेतावनी दिँदै आएको छ। यधपी पश्चिमले यी चेतावनीहरूलाई बेवास्ता गरेको छ।

रुसको रक्षा मन्त्रालयले, युक्रेनले रुस विरोधी शक्तिशाली अभियान सुरु गर्न मस्कोलाई आणविक आतंकवादी संगठनको रूपमा लेबल गर्ने योजना बनाएको दाबी गरेको छ । क्रेमलिनका प्रवक्ता दिमित्री पेस्कोभका अनुसार युक्रेनले रुसलाई बदनाम गराउन आफ्नै भूमिमा परमाणु बम प्रयोग गर्ने योजना बनाएको र पश्‍चिमा राष्ट्रहरुले यो घटनालाई विश्वास गर्न अस्वीकार गरेर बेवास्ता गर्दा खतरा झनै बढेको बताएका छन्।

रुसी रक्षा मन्त्रालयका अनुसार युक्रेनले स्थानीय जनतालाई धम्की दिन, युरोपेली युनियनमा शरणार्थी पलायन गराउन र मस्कोलाई “आणविक आतंकवादी” भनी चित्रण गर्नको लागि “परमाणु बम” विस्फोट गर्ने योजना बनाएको छ।

यता संयुक्त राष्ट्रसंघले भने द्वन्द्वमा संलग्न सबै पक्षलाई संयमता अपनाउन पनि आग्रह गरेको छ । एक ब्रीफिंगको क्रममा, संयुक्त राष्ट्रसंघका महासचिव एन्टोनियो गुटेर्रेसका प्रवक्ता स्टेफेन डुजारिकले सबै पक्षहरूले थप द्वन्द्व निम्त्याउन सक्ने कार्यहरूबाट टाढा रहनुपर्ने बताएका छन्।