कानुन व्यवसायीहरुको छाता संगठन नेपाल बार एसोसिएसनको अध्यक्षमा गोपालकृष्ण घिमिरे निर्वाचित भएका छन् । अध्यक्षमा व्यापक लोकतान्त्रिक प्रगतिशील समावेशी तथा पेशागत कानुन व्यवसायी समूहका घिमिरे ४ हजार ४ सय ३३ मत प्राप्त गरी निर्वाचित भएका छन् । उनका निकटतम प्रतिद्वन्द्वी विष्णुमणि अधिकारीले २४८२ मत प्राप्त गरे । यस्तै बारको महासचिवमा घिमिरे समूहकी अञ्जिता खनाल विजयी भएकी छन् । खनालले ३६८२ मत प्राप्त गरेकी छन् भने उनको निकटतम प्रतिद्वन्द्वी केदारप्रसाद कोइरालाले २९८९ मत ल्याएका छन् ।

अन्य पदाधिकारी तथा सदस्यमा पनि घिमिरे प्यानल विजयी भएको छ । निर्वाचनमा नयाँ कार्यसमितिका लागि प्रगतिशील तथा व्यावसायिक कानुन व्यवसायी समूह र व्यापक लोकतान्त्रिक प्रगतिशील समावेशी तथा पेशागत कानुन व्यवसायी समूहबीच प्रतिस्पर्धा भएको थियो ।
अध्यक्षसहित ११ पदाधिकारी र सदस्य रहेको २५ सदस्यीय कार्यसमितिका लागि निर्वाचन भएको छ ।