स्थानीय तहको निर्वाचनबारे छलफल गर्न निर्वाचन आयोगले बोलाएको बैठकमा विभिन्न राजनीतिक दलका नेताहरुबीच चर्को विवाद भएको छ ।

आयोगले वैशाखमा हुने स्थानीय तहको निर्वाचनमा निर्वाचन आचारसंहिता पालना गर्ने प्रतिबद्धता जनाउन ७९ राजनीतिक दलसँग बैठक बोलाएको थियो ।

बैठकमा विभिन्न राजनीतिक दलका प्रतिनिधिले निर्वाचन आयोगले दलहरुलाई कुनै छलफल नगरी आचारसंहिता पालना गर्ने लिखित प्रतिबद्धतामा हस्ताक्षर गराउने प्रयासको विरोध गरेका थिए ।

दलका प्रतिनिधिले आपत्ति जनाउन थालेपछि बैठक केहीबेर प्रभावित भएको थियो । आयोगले दलका प्रमुखलाई छलफलका लागि आमन्त्रण गरेको भएपनि केही दलका प्रतिनिधिले बैठकमा केही दलका केन्द्रीय सदस्यसमेत रहेको भन्दै आपत्ति जनाएका थिए ।