काठमाडौं -लगातारको वर्षापछि देशका विभिन्न भागमा आएको बाढी र पहिरोका कारण सडक पूर्वाधारमा ठूलो क्षति पुगेको र सडक अवरुद्ध हुँदा यातायात व्यवस्था प्रभावित बनेको भौतिक पूर्वाधार तथा यातायात मन्त्रालयले जनाएको छ।

मन्त्रालयका अनुसार अवरुद्ध सडक पुनः सञ्चालनका लागि आवश्यक जनशक्ति, मेसिनरी उपकरण र स्रोतहरू परिचालन गरी मर्मत कार्य तीब्र रूपमा भइरहेको छ। विशेषगरी प्रमुख राजमार्गका खण्डहरूलाई प्राथमिकतामा राखी अवरोध हटाउने काम जारी छ।

मन्त्रालयले जारी गरेको विज्ञप्तिमा भनिएको छ कि सडक विभागले यातायात पुनः सुचारु गर्नका लागि आवश्यक सबै स्रोत र जनशक्ति सक्रिय बनाएको छ। केही राजमार्गमा रातदिन मर्मत र डाइभर्सन निर्माणको काम भइरहेको छ।

काठमाडौंबाट पोखरा र नारायणघाटतर्फ जाने पृथ्वी राजमार्ग तथा नारायणघाट–मुग्लिन सडकखण्डमा अवरोध हटाइएर सवारीसाधन सञ्चालन सुरु भएको मन्त्रालयले जनाएको छ। साथै, अवरुद्ध बीपी राजमार्ग (भकुण्डेवेसी–नेपालथोक) र मेची राजमार्गमा पनि मर्मत र डाइभर्सन निर्माण कार्य सुरु भएको छ।

सडक पुनः सञ्चालनका लागि जिल्ला प्रशासन कार्यालय, नेपाल प्रहरी, सशस्त्र प्रहरी, ट्राफिक प्रहरी र स्थानीय तहहरूसँग सहकार्य भइरहेको मन्त्रालयले जनाएको छ।

सडकको अद्यावधिक जानकारीका लागि सडक विभागको वेबसाइट वा विभागको कल सेन्टर ९८५१४१६८९३ मा सम्पर्क गर्न आग्रह गरिएको छ।

मन्त्रालयले बाढीपहिरोका कारण ज्यान गुमाउनेहरूप्रति श्रद्धाञ्जली अर्पण गर्दै घाइते र प्रभावित नागरिकप्रति सहानुभूति व्यक्त गरेको छ। साथै, सबैलाई संयम र सावधानी अपनाउन आग्रह गरेको छ।