दोलखा — नेपाली सेनाको जग्गामा अतिक्रमण गरी बनाइएका घरटहरा हटाइएको छ । लामो समयदेखि स्थानीयले मेलुङ गाउँपालिका–६ टुडिखेल वरपर अतिक्रमण गरेर बनाएका ३९ वटा घरटहरा हटाइएको प्रमुख जिल्ला अधिकारी शिवराम गेलालले बताए ।

नेपाली सेनाको जग्गा अतिक्रमण गरेर बनाइएका घरटहरा नेपाली सेनाको गरुड दल, जनपद र सशस्त्र प्रहरीसहितको टोलीले हटाएको हो । सेनाको जग्गामा बनेका घरटहरामा डोजर लगाएर भत्काइएको उनले बताए ।

‘सार्वजनिक जग्गामा बनेका घरटहरा भत्काउन सूचना जारी गरेर अतिक्रमण हटाउने अभियान अर्न्तगत काम थालेका छौं,’ उनले भने, ‘जिल्लाभर सार्वजनिक जग्गा अतिक्रमण भएका क्षेत्रबाट स्थायी र अस्थायी संरचना हटाउन र नबनाउन भनेका छौं ।’

२००७ सालमा दोलखा र रामेछापको सदरमुकाम रहेको मेलुङमा तत्कालीन समयमा सेनाको टुकडी रहेको थियो । २०१८ सालमा दुई जिल्लाको प्रशासनिक ईकाई रहेको मेलुङ सोही वर्ष भएको राजनीतिक विभाजनपछि सदरमुकाम हटेको हो ।

नेपाली सेनाको गरुडदल गणले तालिम सञ्चालन गर्नका लागि आफ्नो जग्गामा भएको अतिक्रमण हटाइदिन प्रशासनलाई आग्रह गरेको थियो । मेलुङमा नेपाली सेनाको नाममा ६९ रोपनी जग्गा हेको छ । अतिक्रमण हटेपछि गरुडदल गणले तालिम सञ्चालन गर्ने जनाएको छ ।