काठमाडौँ- नेकपा माओवादी केन्द्रका उपमहासचिव हरिबोल गजुरेलले पार्टी नेतृत्वबाट भएका ६ वटा गल्ती भएको र पार्टी बिग्रनुमा आफू पनि दोषी रहेको स्वीकार गरी प्रायश्चित गर्दै पदबाट राजीनामा दिएका छन्।

गजुरेलले दिएको राजीनामापत्रमा उनले अन्य पदाधिकारीहरु सबैलाई पनि सामूहिक राजीनामा दिन आह्वान गर्दै, पार्टीमा देखापरेका समस्या समाधानका लागि बृहत् छलफल नगर्ने हो भने गम्भीर दुर्घटनामा पर्ने चेतावनी समेत दिएका छन्।

राजिनामा पत्रमा उनले अन्य पदाधिकारीहरुलाई सम्बोधन गर्दै लेखेका छन् “पदाधिकारी कमरेडहरू सामूहिक राजीनामा दिन तयार हुनुहुन्न भने म आफ्नो भागमा पर्ने गल्तीको नैतिक जिम्मेवारी लिँदै स्थायी समितिमा विस्तृत कुरा राख्न पाउने अपेक्षासहित उपमहासचिव पदबाट अध्यक्षसमक्ष राजीनामा पेस गर्ने अनुमति चाहन्छु। “

राष्ट्रिय सभा निर्वाचनमा अध्यक्ष प्रचण्डका भाइ नारायण दाहाललाई अध्यक्ष बनाइएकोप्रति उनले गम्भीर असन्तुष्टि जनाउंदै, राष्ट्रिय सभा अध्यक्ष चयन प्रक्रियामा अपनाइएको तरिकाले पदाधिकारीहरूको नैतिक धरातल धुजाधुजा भएको र मार्क्सवादको नीति, विचार र विधिबाट पार्टी च्यूत भएको पनि उनले बताएका छन्।

आठौँ महाधिवेशनमा ४६ जनाको स्थायी समिति निर्माण गर्दा जम्मा १५ जना मात्र पदाधिकारी हुनुपर्नेमा २१ जना बनाएर विधि र पद्धति मात्र नभई विधानकै उल्लंघन भएको आरोप लगाएका गजुरेलले यसअघि प्रचण्ड प्रधानमन्त्री छँदा प्रधानमन्त्रीको सल्लाहकार पदबाट पनि राजीनामा दिएका थिए।

यता, माओवादी कार्यालयका सचिव डोरप्रसाद उपाध्यायले भने गजुरेलले राजीनामा दिएको नभई आफ्ना सुझावहरू लिखित रूपमा राखेको दाबी गरेका छन् ।