काठमाडौं — पछिल्ला दुई दिनमा देशभर विभिन्न प्राकृतिक विपद्का घटनाबाट ४९ जनाले ज्यान गुमाएका छन्। सशस्त्र प्रहरी बल नेपालका अनुसार बाढी, पहिरो, चट्याङ र सवारी दुर्घटनाका कारण १३ जना घाइते भएका छन्।

विपद्का घटनापछि हालसम्म ११ जना बेपत्ता रहेका सशस्त्र प्रहरीले जनाएको छ। तीमध्ये सबैभन्दा धेरै क्षति इलाम जिल्लामा भएको हो, जहाँ बाढीपहिरोका कारण ३७ जनाको मृत्यु र दुई जना गम्भीर घाइते भएका छन्।

यस्तै, उदयपुरमा दुई, रौतहटमा तीन, रसुवामा चार र काठमाडौंमा एक जनाको मृत्यु भएको छ। खोटाङ, भोजपुर, रौतहट र मकवानपुरमा चट्याङ लाग्दा आठ जना घाइते भएका छन्।

पाँचथरमा भएको सवारी दुर्घटनामा छ जनाको मृत्यु र छ जना घाइते भएका सशस्त्र प्रहरीले जानकारी दिएको छ।