काठमाडौं — लगातारको वर्षाका कारण देशका तीन जिल्लामा गएको पहिरोले २२ जनाको ज्यान लिएको छ। नेपाल प्रहरीका अनुसार शनिबार र आइतबार उदयपुर, रौतहट र इलामका विभिन्न ठाउँमा पहिरोका घटनामा जनधनको ठूलो क्षति भएको हो।

प्रहरीका अनुसार इलाममा मात्रै १८ जनाको मृत्यु भएको छ। त्यहाँ सातजना अझै बेपत्ता छन् भने छ जनालाई जिवितै उद्धार गरिएको छ।

रौतहटमा पहिरोका कारण तीन जनाको मृत्यु भएको छ। त्यस्तै उदयपुरमा एक जनाको मृत्यु भएको र २१ जना बेपत्ता रहेको प्रहरीले जनाएको छ।

प्रहरीका अनुसार लगातारको वर्षाका कारण पहिरो जोखिम अझै कायम रहेकाले उद्धार कार्यमा सेना, सशस्त्र प्रहरी र नेपाल प्रहरीका टोली खटिएका छन्।