इलाम — शनिबार रातिदेखि लगातार परेको वर्षाका कारण आएको बाढी र पहिरोमा परी इलाम जिल्लामा १८ जनाको मृत्यु भएको छ। कोशी प्रदेश प्रहरी कार्यालयका अनुसार मृत्यु हुनेहरू इलाम जिल्ला अन्तर्गत विभिन्न ठाउँका रहेका छन्

सबैभन्दा धेरै पाँच जनाको मृत्यु सूर्योदय नगरपालिका–१ मानेभञ्ज्याङमा भएको छ। चार जनाको शव घटनास्थलमै फेला परेका छन् भने एक जनाको शव पछि उद्धार टोलीले भेटाएको प्रहरी स्रोतले जनाएको छ।

नेपाल–भारत सीमाको नजिक रहेका कारण उद्धार कार्यमा नेपाल प्रहरी, सशस्त्र प्रहरी बल र भारतीय सुरक्षा निकाय एसएसबीले संयुक्त रूपमा सहयोग गरेको बताइएको छ। मृतकहरूको पहिचान अझै खुलेको छैन।

कोशी प्रदेश प्रहरी कार्यालयका अनुसार मृत्यु हुनेमध्ये मानेभञ्ज्याङमा ५ जना, माङसेबुङ गाउँपालिका–१ पाटीगाउँमा ३ जना, देउमाई नगरपालिका–५ धारेमा १ जना, देउमाई–५ धुसुनेमा २ जना, फाकफोकथुम गाउँपालिका–३ रातमाटेमा १ जना, र इलाम नगरपालिका–५ घोसगाउँमा ६ जना गरी जम्मा १८ जनाको मृत्यु भएको हो।