गाजा-अमेरिकी राष्ट्रपति डोनाल्ड ट्रम्पले इजरायलले अस्थायी रूपमा बमबारी रोकेको बताए पनि गाजा पट्टीभरि इजरायली हवाई आक्रमणमा कम्तिमा ६१ प्यालेस्टिनीको मृत्यु भएको छ।

ट्रम्पको गाजा शान्ती वार्ता प्रस्तावमा हमासले बन्दी बनाएका सबिलाई रिहा गर्ने बताएको केहि समयपछि नै गाजामा भएको आक्रमणमा ६१ प्यालेस्टिनीको मृत्यु भएको हो । हमासले गाजाको प्रशासन प्यालेस्टिनी टेक्नोक्रेटहरूको टोलीलाई हस्तान्तरण गर्न र प्यालेस्टिनी कैदीहरूको बदलामा सबै इजरायली बन्दीहरूलाई रिहा गर्न सहमत भएको छ।

यद्यपि, हमासले विज्ञप्तिमा निशस्त्रीकरणको मुद्दालाई भने सम्बोधन गरेको छैन तर मध्यस्थता वार्तामा तुरुन्तै प्रवेश गर्न तयार रहेको भनिएको छ।

अक्टोबर २०२३ मा गाजामाथि इजरायलको युद्ध सुरु भएदेखि, कम्तिमा ६७,०७४ जना मारिएका छन् र १६९,४३० जना घाइते भएका छन्, हजारौं भग्नावशेषमुनि फसेको आशंका गरिएको छ।

यसैबीच, इजरायलका अति दक्षिणपन्थी अर्थमन्त्री बेजालेल स्मोट्रिचले अमेरिकी राष्ट्रपतिको प्रस्तावमा वार्ता गर्नकै लागि गाजा आक्रमण रोक्न सहमत भएकोमा प्रधानमन्त्री बेन्जामिन नेतान्याहूको आलोचना गरेका छन् ।

नेतान्याहूको गठबन्धन सरकारका एक प्रमुख व्यक्तित्व र कब्जा गरिएको पश्चिम किनारमा रहेको अवैध बस्तीका बासिन्दा स्मोट्रिचले बारम्बार इजरायललाई गाजा पट्टी कब्जा गर्न आह्वान गरेका छन्।