काठमाडौँ- देशभर लगातार वर्षा भइरहेको बेला बाढी पूर्वानुमान महाशाखाले काठमाडौँसहित २० जिल्लामा ‘रेड अलर्ट’ जारी गरेको छ।

महाशाखाका अनुसार काठमाडौँ, ललितपुर, भक्तपुर, सिन्धुपाल्चोक, काभ्रेपलाञ्चोक, सुनसरी, उदयपुर, सप्तरी, सिरहा, धनुषा, महोत्तरी, सर्लाही, रौतहट, बारा, पर्सा, सिन्धुली, दोलखा, रामेछाप, मकवानपुर र चितवनमा बाढीको अत्यधिक जोखिम देखिएको छ।

त्यस्तै इलाम, झापा, मोरङ, धनकुटा, तेह्रथुम, पाँचथर, भोजपुर, खोटाङ, ओखलढुंगा, सोलुखुम्बु, संखुवासभा, ताप्लेजुङ, रसुवा, नुवाकोट, धादिङ, गोरखा, नवलपरासी पूर्व र पश्चिम, रुपन्देही, कपिलवस्तु लगायतका जिल्लामा पनि बाढीको उच्च जोखिम रहेको बताइएको छ।

साथै कास्की, लमजुङ, पर्वत, स्याङ्जा, तनहुँ, गुल्मी, पाल्पा, अर्घाखाँची, प्युठान, दाङ, बाँके र बर्दिया जिल्लाका साना नदी–नालामा पानीको बहाब तीव्र हुनसक्ने तथा आकस्मिक बाढी आउने सम्भावना रहेको महाशाखाले चेतावनी दिएको छ।

महाशाखाले नागरिकलाई सतर्क रहन र जोखिमयुक्त क्षेत्रबाट टाढा रहन आग्रह गरेको छ।