काठमाडौं – राष्ट्रिय विपद जोखिम न्यूनीकरण तथा व्यवस्थापन प्राधिकरणले आगामी चार दिनसम्म कोशी, मधेश, बागमती, गण्डकी र लुम्बिनी प्रदेशमा जरुरी नभएसम्म यात्रा नगर्न सार्वजनिक अपिल गरेको छ।

असोज १७ गते शुक्रबार देखि असोज २० गते सोमबार सम्म लामो दुरीको यात्रा नगर्न आग्रह गरिएको छ। यो चेतावनी जल तथा मौसम विज्ञान विभागको पूर्वानुमानलाई आधार मानेर गरिएको हो, जसअनुसार सो अवधिमा यी प्रदेशका विभिन्न जिल्लामा ठूलो वर्षा हुने सम्भावना छ।

प्राधिकरणका अनुसार बागमती, कमला र कोशी नदीमा पानीको सतह खतराको स्तरमा पुग्न सक्ने भएकाले विशेष सतर्कता अपनाउन जरुरी छ।

उच्च जोखिम रहेका क्षेत्रहरूमा आकस्मिक बाढी आउन सक्ने भन्दै चेतावनी दिइएको छ। बागमती प्रदेशमा काठमाडौं उपत्यका, काभ्रेपलाञ्चोक, सिन्धुपाल्चोक, रसुवा, मकवानपुर, चितवन; कोशी प्रदेशमा संखुवासभा, ताप्लेजुङ, इलाम, झापा, मोरङ; र मधेश प्रदेशमा बारा, पर्सा, सर्लाही, रौतहट तथा आसपासका क्षेत्र प्रभावित हुने सम्भावना छ।

प्राधिकरणले जारी गरेको सन्देशअनुसार:

अत्यावश्यक नभएसम्म टाढा यात्रा वा रातको समयमा यात्रा नगर्नु।

जिल्लास्तरीय विपद् व्यवस्थापन समितिले वर्षा र सडक अवस्थाको मूल्याङ्कन गरी सवारी साधन रोक्ने निर्णय लिन र कार्यान्वयन गर्न सक्ने।

भूस्खलन सम्भावित तथा नदी किनारका बस्तीहरू उच्च सतर्क रहनु।

बाढी सम्भावित बस्तीका बासिन्दाले सुरक्षित स्थान पहिचान गरी आवश्यक पर्दा तुरुन्त सार्न तयारी राख्नुपर्छ।

यस्तै, प्राधिकरणले तीनवटै सुरक्षा निकाय, स्थानीय सरकार, स्वयंसेवक र सरोकारवालाहरूलाई तयारी अवस्थामा रहन आह्वान गरेको छ। जोखिमपूर्ण राजमार्ग र सडकमा प्रयोग गर्न सकिने डोजर, एक्जाभेटर र लोडर जस्ता उपकरण तत्पर अवस्थामा राख्न भनिएको छ। साथै सहकार्य संस्थाहरूलाई जिल्लास्तरीय तथा स्थानीय विपद् व्यवस्थापन समितिसँग समन्वय गरेर सतर्कता र तयारीमा सहयोग गर्न आग्रह गरिएको छ।