काठमाडौँ- सिङ्गो देश यतिबेला दशैँ बिदामा छ। अधिकांश सरकारी कार्यालय, विद्यालय र कार्यालाहरु बन्द जस्तै छन। तर ऊर्जा जलस्रोत तथा सिंचाइ, भौतिक पूर्वाधार तथा यातायात तथा शहरी विकासमन्त्री कुलमान घिसिङ भने आज बीपी राजमार्गमा क्षतिग्रस्त सडकको निरीक्षण गर्न पुगेका छन्।

चाडपर्वको समयमा सडकमा गएको पहिरोको कारण देशका विभिन्न भागमा यात्रुहरू अलपत्र परेको समाचार आइरहेका बेला बीपी राजमार्गमा क्षतिग्रस्त सडकको निरीक्षण गर्न मन्त्री कुलमान घिसिङ सडक विभागका महानिर्देशक तथा अन्य सम्बन्धित अधिकारीसँगै क्षतिग्रस्त सडक निरीक्षण गर्न पुगेका हुन्।

जापान सरकारको अनुदान सहयोगमा बनेको बीपी राजमार्गको कुल १६० किलोमिटर लामो सडक अन्तर्गत गत वर्षको बाढीले करिब ३० किलोमिटरभन्दा बढी खण्ड क्षतिग्रस्त बनाएको थियो।

मन्त्री घिसिङले चाडपर्वका समयमा यात्रुहरूलाई असुविधा नहोस् भन्दै अस्थायी ट्राफिक व्यवस्थापन चुस्त बनाउन र स्थायी पुनर्निर्माणलाई छिटो टुंग्याउन निर्देशन दिएका छन्। उनले बाढीले क्षति पुर्याएको करिब २५ किलोमिटर खण्डमा ठेक्का सम्झौता भइसकेको र बाँकी खण्ड जापानी संस्थान जाइकाले अनुदानमार्फत निर्माण गर्ने तयारी भइरहेको जानकारी दिए। दशैँ–तिहारपछि तीव्र गतिमा निर्माण सुरु हुने र सकेसम्म चाँडै सडकलाई पूर्ववत् अवस्थामा ल्याइने उनले बताए।