वाशिंगटन – सात वर्षपछि पहिलो पटक अमेरिकाको संघीय सरकार बन्द भएको छ। सिनेटमा खर्च सम्बन्धी विधेयकमा रिपब्लिकन र डेमोक्र्याटबीच सहमति हुन नसकेपछि यस्तो अवस्था आएको हो।

बुधबार सरकार सञ्चालनका लागि आवश्यक बजेट पास गर्ने अन्तिम म्याद सकिए पनि दुवै दलले एकअर्काको प्रस्ताव अस्वीकार गरे। डेमोक्र्याटहरूले रिपब्लिकनको प्रस्ताव समर्थन गर्न अस्वीकार गर्दै, वर्षको अन्त्यमा सकिँदै गरेका ‘अफोर्डेबल केयर एक्ट’का सब्सिडी लम्ब्याउन र मेडिकेड कटौती फिर्ता लिन माग गरे। रिपब्लिकनले आफ्नो योजना “स्वच्छ” र गैर–पक्षपाती भएको दाबी गरे पनि डेमोक्र्याटहरूले यसले लाखौं अमेरिकीको स्वास्थ्य सेवामा खतरा ल्याउने तर्क गरे।

संकटको जिम्मेवारीमा दुवै दलले एकअर्कालाई दोषारोपण गरेका छन्। सिनेट रिपब्लिकन नेता जोन थुनले “कट्टर वामपन्थी समूह र डेमोक्र्याट सांसदहरूले राष्ट्रपति सँग टकराव खोजेका” आरोप लगाए भने सिनेट अल्पसंख्यक नेता चक शुमरले रिपब्लिकनहरूलाई “अमेरिकी स्वास्थ्य सेवामा जोखिम ल्याएको” र जिम्मेवार ढंगले वार्ता नगरेको भन्दै दोष दिए।

व्हाइट हाउसले पनि डेमोक्र्याटलाई दोष दिएको छ। उसको आधिकारिक वेबसाइटमा अहिले ‘डेमोक्र्याटहरूले सरकार बन्द गरेका छन्’ शीर्षकसहित घडी राखिएको छ जसले संकटको अवधि देखाइरहेको छ।

रिपब्लिकनहरूले आफ्नो बजेट प्रस्ताव सिनेटमा बिहीबार बिहान फेरि प्रस्तुत गर्ने घोषणा गरेका छन्। उनीहरूले डेमोक्र्याटहरूले स्वीकार नगरेसम्म दैनिक रूपमा प्रस्ताव पुनः भोटमा ल्याइरहने बताएका छन्।

यस सरकार बन्दसँगै संघीय निकायका केही सेवा बन्द हुनेछन् र धेरै सरकारी कर्मचारी बिदामा पठाइनेछन्। सन् २०१८ डिसेम्बर २२ मा सुरु भएको अघिल्लो सरकार बन्द ३५ दिनसम्म चलेको थियो, जुन अमेरिकी इतिहासकै सबैभन्दा लामो हो।