काठमाडौं – दशैंको नवौं दिन अर्थात् महानवमीका अवसरमा आज हनुमानढोका दरबार क्षेत्रमा रहेको ऐतिहासिक तलेजु भवानी मन्दिर सर्वसाधारणका लागि खुला गरिएको छ। बिहानैदेखि भक्तजनहरू दर्शन र पूजा गर्न लामबद्ध भएका छन्।

नेवार समुदायको इष्टदेवीका रूपमा पूजिने तलेजु भवानीलाई मातृशक्ति र दैवीशक्तिको प्रतीकका रूपमा पनि मानिन्छ। नवरात्रको सातौं दिन फूलपातीकै अवसरमा देवीलाई हनुमानढोका दरबारको मूलचोकमा ल्याइने परम्परा छ भने विजयादशमीको दिन बिहान पुनः मूल मन्दिरमा फर्काइन्छ।

महाअष्टमीको राति मूलचोकमा विधिपूर्वक कालरात्रि पूजा सम्पन्न गरिन्छ। यस क्रममा ५४ वटा राँगा र ५४ वटा बोका बलि दिने चलन छ। यो परम्परा राज्य संचालनमा बल र शक्ति प्राप्त होस् भन्ने विश्वासमा आधारित छ।

महानवमीका दिन काठमाडौं उपत्यकासहित देशभरका विभिन्न शक्तिपीठ र देवी मन्दिरहरूमा विशेष पूजा, बलि तथा दुर्गासप्तशती, देवीभागवत र अन्य स्तोत्रको पाठ गरिन्छ।