काठमाडौं – आज आश्विन शुक्ल नवमीका दिन नवरात्रको अन्तिम दिनका रूपमा सिद्धिदात्री देवीको विशेष पूजा आराधना गरिन्छ । नवदुर्गामध्ये नवौँ स्वरूप मानिने देवीको आराधना गर्दा मोक्ष प्राप्त गरिने विश्वाश भएकाले ‘सिद्धिदात्री’ भनिन्छ।

घटस्थापनादेखि सुरु भएको नवरात्रमा प्रत्येक दिन फरक–फरक देवीको आह्वान गरी पूजा आराधना गर्ने वैदिक परम्परा छ। यसक्रममा शैलपुत्री, ब्रह्मचारिणी, चन्द्रघण्टा, कुष्माण्डा, स्कन्दमाता, कात्यायनी, कालरात्रि र महागौरीको पूजा सम्पन्न भइसकेको छ। आज अन्तिम दिन सिद्धिदात्री देवीलाई विशेष विधिअनुसार आराधना गरिँदैछ।

धर्मशास्त्रका अनुसार नौ दुर्गाको स्मरण मात्रले पनि दुःख कष्ट हट्ने र मनोकामना पूरा हुने विश्वास छ। यसै कारण आज देशभरका शक्तिपीठहरूमा भक्तजनको भीड लाग्ने गर्दछ। घरघरमा पनि विशेष पूजा, बलिप्रथा र प्रसाद चढाउने प्रचलन छ।

यसवर्ष विजयादशमीमा बिहान ११ः५३ बजे टीकाको साइत उत्तम रहेको नेपाल पञ्चाङ्ग निर्णायक समितिले जनाएको छ। नवरात्रमा चढाइएका प्रसादलाई विजयादशमीदेखि कोजाग्रत पूर्णिमासम्म लगाउने परम्परा रहिआएको छ।