काठमाडौँ – भदौ २३ र २४ गतेको जेनजी आन्दोलनमा भएको मानवीय तथा भौतिक क्षतिबारे छानबिन गर्न गठित न्यायिक आयोगले पूर्वप्रधानमन्त्री केपी शर्मा ओलीसहित पाँच जनाको पासपोर्ट रोक्का गर्न सिफारिस गरेको छ। आयोगले उनीहरूलाई आयोगको अनुमति बिना काठमाडौं उपत्यका बाहिर जान पनि रोक लगाएको छ।

गौरीबहादुर कार्की नेतृत्वको आयोगले आइतबार सरकारलाई पत्राचार गर्दै ओली, पूर्वगृहमन्त्री रमेश लेखक, पूर्वगृहसचिव गोकर्णमणि दुवाडी, पूर्वराष्ट्रिय अनुसन्धान विभाग प्रमुख हुतराज थापा र पूर्वप्रमुख जिल्ला अधिकारी छविलाल रिजाललाई अनुसन्धान दायरामा राखिएको जनाएको हो।

आयोगको निर्णयपत्रमा भनिएको छ, “भदौ २३ र २४ गतेका घटनाको छानबिन तथा जाँचबुझको क्रममा यी व्यक्तिहरु अनुसन्धानको दायरामा रहेकाले उनीहरूको विदेश भ्रमण रोक लगाउन आवश्यक कारबाही गर्न, साथै कुनै पनि समयमा आयोगमा उपस्थित हुनुपर्ने भएकाले आयोगको स्वीकृति बिना उपत्यका छाड्न नपाउने व्यवस्था मिलाउन सम्बन्धित निकायलाई निर्देशन दिन पत्राचार गरिएको हो।”

छानबिन आयोगले छानबिनलाई अझ प्रभावकारी बनाउनका लागि गृह मन्त्रालयलाई विज्ञसहितको थप जनशक्ति उपलब्ध गराउन पनि आग्रह गरेको छ।