काठमाडौं – जेन-जि युवा आन्दोलनमा घाइते भएका व्यक्तिहरूलाई उपचारमा सहजता दिलाउन गृह मन्त्रालयले परिचयपत्र वितरण सुरु गरेको छ। परिचयपत्रको आधारमा घाइतेहरूले अस्पतालमा सहज उपचार सेवा पाउनेछन्।

आइतबार गृहमन्त्री ओमप्रकाश अर्यालले राष्ट्रिय ट्रमा सेन्टरमा पुगेर घाइतेहरूलाई परिचयपत्र वितरण गरे। सोमबारदेखि देशभरका जिल्ला प्रशासन कार्यालयहरूमार्फत परिचयपत्र वितरण थालिने भएको छ।

गृह मन्त्रालयका अनुसार, घाइतेहरूको व्यवस्थित फलोअप उपचारका लागि काठमाडौं उपत्यकासहित देशभर १६ अस्पतालमा डेडिकेटेड “जेन-जि क्लिनिक” स्थापना गरिएको छ। साथै, घाइतेहरूलाई अस्पतालसम्म नि:शुल्क आवतजावतको सुविधा उपलब्ध गराइने र आवश्यक परेमा स्वास्थ्य मन्त्रालय वा सम्बन्धित अस्पतालमार्फत नि:शुल्क एम्बुलेन्स सेवा पनि उपलब्ध हुनेछ।

उपचारमा संलग्न विज्ञ डाक्टरहरूको संयोजकत्वमा घाइतेहरूको वर्गीकरण गर्न कार्यदल गठन गर्ने तयारी छ। यस विषयमा आइतबार बस्ने मन्त्रिपरिषद बैठकले निर्णय गर्नेछ।

मन्त्रालयले अस्पतालमा सम्पर्क व्यक्ति समेत तोकिएको जानकारी दिएको छ।

जेन-जि क्लिनिक स्थापना गरिएका अस्पतालहरू:

काठमाडौं उपत्यका: वीर अस्पताल, राष्ट्रिय ट्रमा सेन्टर, निजामती कर्मचारी अस्पताल (सिभिल), पाटन स्वास्थ्य विज्ञान प्रतिष्ठान, त्रिवि शिक्षण अस्पताल महाराजगञ्ज।
कोशी प्रदेश: बीपी कोइराला स्वास्थ्य विज्ञान प्रतिष्ठान धरान, कोशी अस्पताल विराटनगर।
मधेश प्रदेश: नारायणी अस्पताल वीरगञ्ज, गजेन्द्र नारायण सिंह अस्पताल सप्तरी।
बागमती प्रदेश: भरतपुर अस्पताल चितवन।
गण्डकी प्रदेश: पोखरा स्वास्थ्य विज्ञान प्रतिष्ठान।
लुम्बिनी प्रदेश: भेरी अस्पताल नेपालगञ्ज, राप्ती स्वास्थ्य विज्ञान प्रतिष्ठान घोराही।
कर्णाली प्रदेश: कर्णाली स्वास्थ्य विज्ञान प्रतिष्ठान जुम्ला।
सुदूरपश्चिम प्रदेश: डडेलधुरा अस्पताल, गेटा अस्पताल धनगढी।