काठमाडौं – आगामी आमनिर्वाचनको तयारी सुरु भएको सन्दर्भमा सभा, जुलुस, विरोध प्रदर्शनलगायतका गतिविधि शान्तिपूर्ण ढंगले सञ्चालन गर्न गृह मन्त्रालयले सबैसँग अनुरोध गरेको छ।

विज्ञप्ति जारी गर्दै मन्त्रालयले समाजमा शान्ति, सुव्यवस्था र सुरक्षा कायम राख्न कुनै पनि प्रकारका सार्वजनिक कार्यक्रम सञ्चालन गर्दा अहिंसात्मक र जिम्मेवार ढंग अपनाउन आह्वान गरेको हो।

विज्ञप्तिमा भनिएको छ, “गत भदौ २३ र २४ गते जेन–जी युवाको नेतृत्वमा सुशासन, भ्रष्टाचार नियन्त्रण र राष्ट्रहितका मागसहित भएको आन्दोलनपछि नयाँ सरकार गठन भई आमनिर्वाचनको प्रारम्भिक कार्य अघि बढिसकेको छ। यस्तो परिस्थितिमा सभा, सम्मेलन, बैठक वा विरोध प्रदर्शन गर्दा अरूलाई असर नपर्ने, उत्तेजना नहुने र समाजमा अशान्ति सिर्जना नगर्ने गरी सञ्चालन गर्न सबैलाई अनुरोध गर्दछौं।”

मन्त्रालयले लोकतान्त्रिक अधिकार प्रयोग गर्दा जिम्मेवारीपूर्वक आचरण गर्नुपर्नेमा पनि जोड दिएको छ।