काठमाडौं – प्रधानसेनापति अशोकराज सिग्देलले ताजा घटनाक्रम र मुलुकको वर्तमान अवस्थाबारे पूर्व प्रधानसेनापतिहरूसँग परामर्श गरेका छन्।

जंगी अड्डामा भएको छलफलमा उनले अहिलेको परिस्थिति विश्लेषण गर्दै यस्तो अवस्थामा सेनाले निर्वाह गर्नुपर्ने भूमिकासम्बन्धी सुझाव लिएका हुन्।

यसैबीच नेपाली सेनाका विभाग, महानिर्देशनालय र निर्देशनालयका प्रमुखहरू जंगी अड्डामा भेला भए। साथै, डिभिजन कमाण्डरहरूसँग भर्चुअल माध्यममार्फत समन्वयात्मक बैठकसमेत सम्पन्न गरियो।

सैनिक जनसम्पर्क तथा सूचना निर्देशनालयका अनुसार, बैठकमा विभागीय प्रमुख र डिभिजन कमाण्डरहरूले आफ्नो क्षेत्रको स्थिति, सम्पन्न गरेका कार्यहरूको समीक्षा र आगामी सुझावहरू प्रस्तुत गरे।

बैठकको समापनमा प्रधानसेनापति सिग्देल र बलाध्यक्ष रथी प्रदीप जङ्ग केसीले सम्बोधन गरेका थिए।

वार्षिक कार्ययोजनाअनुसार डिभिजन कमाण्डरहरूको समन्वय बैठक वर्षमा दुई पटक आयोजना हुने गर्दछ। कमाण्डरहरूको जिम्मेवारी फेरबदल भएपछिको यो पहिलो बैठक हो।