काठमाडौँ – प्रधानमन्त्री सुशीला कार्कीले पाँच जना नयाँ मन्त्रीहरूको नाम राष्ट्रपति समक्ष सिफारिस गरेकी छन्।

प्रधानमन्त्रीले सर्वोच्चका पूर्वन्यायाधीश अनिलकुमार सिन्हा, पत्रकार जगदीश खरेल, अतिरिक्त सचिव डा. सङ्गीता मिश्र, वैज्ञानिक महावीर पुन र पूर्वराज्य पुनर्संरचना संयोजक डा. मदन परियारलाई मन्त्रीमा नियुक्तिका लागि सिफारिस गरेकी हुन्।

राष्ट्रपतिको कार्यालयका अनुसार उनीहरूको नियुक्ति र शपथ ग्रहण सोमबार हुनेछ।

सिफारिसअनुसार पूर्वन्यायाधीश सिन्हाले भूमि व्यवस्था, सहकारी तथा गरिबी निवारण, उद्योग वाणिज्य तथा आपूर्ति, र कानुन मन्त्रालयको जिम्मेवारी सम्हाल्नेछन्।

डा. मिश्रालाई स्वास्थ्य मन्त्रालयको जिम्मेवारी दिने सिफारिस गरिएको छ। उनी यसअघि सोही मन्त्रालयकी अतिरिक्त सचिव थिइन् र राजीनामा दिएपछि मन्त्री बन्ने बाटो खुलेको हो।

पत्रकार खरेललाई सञ्चार तथा सूचना प्रविधि मन्त्रालयमा सिफारिस गरिएको छ। उनी दुई दशकभन्दा बढी समयदेखि पत्रकारितामा सक्रिय रहँदै आएका छन्।

डा. परियारलाई कृषि विकास तथा पशुपंक्षी मन्त्रालयमा सिफारिस गरिएको छ। उनी कृषि विज्ञ हुन् र राज्य पुनर्संरचनाको संयोजकसमेत रहिसकेका छन्।

वैज्ञानिक पुनलाई शिक्षा, विज्ञान तथा प्रविधि मन्त्रालयको जिम्मेवारी दिन सिफारिस गरिएको छ। राष्ट्रिय आविष्कार केन्द्रका संस्थापक पुन दुर्गम क्षेत्रमा इन्टरनेट विस्तारमा योगदान पुर्‍याएर म्यागसेसे पुरस्कारसम्म पाइसकेका छन्।