काठमाडौँ — जेन–जी आन्दोलनका क्रममा भएको प्रहरी दमन र त्यसपछि भड्किएको हिंसाले देशभरका धेरै प्रहरी चौकीमा आगजनी र तोडफोडका घटना भए । दुई दिनको घटनामा हाल सम्म ३ प्रहरी सहित ७४ जनाले ज्यान गुमाएका छन् भने करिब २०० जना अझै अस्पतालमा उपचाररत छन्।

नेपाल प्रहरीले तयार पारेको आन्तरिक प्रतिवेदनअनुसार आन्दोलनकै क्रममा १२७६ थान राइफल र पिस्तोल लुटिएका छन्। त्यस्तै, ९८ हजार ४९१ थान गोली अभिलेखमा हराएको देखिएको छ। यीमध्ये कति प्रहरी आफैंले प्रयोग गरियो र कति लुटिए भन्ने यकिन तथ्य पत्ता लगाउन उच्चस्तरीय छानबिन आयोग आवश्यक भएको प्रतिवेदनमा उल्लेख छ।

यस्तै १३१५ राउन्ड रबर गोलीसमेत अभिलेखमा कम भएको देखिन्छ। तीमध्ये कति प्रयोग भए भन्नेबारे प्रहरीले स्पष्ट गर्न सकेको छैन। प्रहरी तथ्यांकअनुसार दुई दिनमै २२२० पटक हवाई फायर र ३२२३ सेल अश्रुग्यास प्रहार गरिएको थियो।