चितवन – नारायणगढ–मुग्लिन सडकअन्तर्गत तुइन खोला पुल नजिक खसेको पहिरो पन्छाउने काम आज बिहानदेखि फेरि सुरु गरिएको सडक डिभिजन कार्यालय भरतपुरले जनाएको छ। पहिरो हटाउन मुग्लिनतर्फ र नारायणगढतर्फ दुवैबाट मेसिन परिचालन गरिएको छ।

तर, ढुंगा झर्ने क्रम अझै जारी छ। थप पहिरो नखसे र काममा बाधा नपरे छिट्टै सडक सञ्चालनमा ल्याउन सकिने कार्यालयले जनाएको छ।

शुक्रबारदेखि इच्छाकामना गाउँपालिका–५ स्थित तुइन खोलामा निरन्तर पहिरो खसेपछि राजमार्ग अवरुद्ध भएको छ। सडक अवरुद्ध हुँदा यात्रुहरू रातभर बाटोमै अलपत्र परेका थिए। अहिले पनि राजमार्गका दुवैतर्फ सवारी साधनको लामो लाइन देखिन्छ।

शनिबार दिउँसो र बेलुकी जिल्ला प्रशासन कार्यालय र प्रहरीले अलपत्र यात्रुहरूको लागि खानेपानी र खाद्यान्नको व्यवस्था गरेका थिए। त्यस्तै, राजमार्गमा रहेका व्यवसायीहरूलाई समेत यात्रु सहयोगका लागि आग्रह गरिएको थियो।

सडक डिभिजन कार्यालय भरतपुरले यात्रुलाई वैकल्पिक मार्ग प्रयोग गर्न सुझाव दिएको छ। विकल्पमा नौबिसे–दामन–हेटौंडा मार्ग र मुग्लिन–भिमाद–डेढगाउँ–गैंडाकोट जोड्ने कालीगण्डकी करिडोर प्रयोग गर्न सकिने जनाएको छ।