काठमाडौं – संविधान दिवस तथा राष्ट्रिय दिवस २०८२ आज देशभर विभिन्न कार्यक्रमहरूका साथ मनाइएको छ। टुँडिखेलस्थित सैनिक मञ्चमा आयोजित मुख्य समारोहमा राष्ट्रपति रामचन्द्र पौडेल प्रमुख आतिथि रहनुभएको थियो। कार्यक्रममा प्रधानमन्त्री सुशीला कार्कीले सम्बोधन गर्नुभएको छ।

कार्यक्रममा पूर्व प्रधानमन्त्री बाबुराम भट्टराई ,पूर्व सभामुख देवराज घिमिरे, राष्ट्रिय सभा अध्यक्ष नारायण दाहाल लगायत मन्त्रीहरुको सहभागिता रहेको थियो । कार्यक्रममा तीन ठूला दलका शीर्ष नेताहरु भने देखिएनन्।

नेपाली जनताको दीर्घ संघर्ष र बलिदानको उपलब्धिका रूपमा संविधानसभा मार्फत २०७२ साल असोज ३ गते नेपालको संविधान घोषणा गरिएको हो। दोस्रो संविधानसभाको निर्वाचनपछि गठन भएको संविधानसभाले लामो छलफल र अथक प्रयासपछि ‘नेपालको संविधान २०७२’ जारी गरेको थियो।