काठमाडौँ — नेपाल राष्ट्र बैंकले सार्वजनिक गरेको तथ्याङ्क अनुसार गत साउनमा मात्र रेमिट्यान्समार्फत १ खर्ब ७७ अर्ब ४१ करोड रुपैयाँ मुलुक भित्रिएको छ जुन गत वर्षको सोही अवधिको तुलनामा यो २९.९ प्रतिशतले बढेको हो । गत वर्षको साउनमा रेमिट्यान्स आप्रवाह १७.७ प्रतिशतले बढेर १ खर्ब ३६ अर्ब ६० करोड भित्रिएको थियो ।

सो अवधिमा वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत–नयाँ) लिने नेपालीको संख्या ४४ हजार ४ सय ६६ र पुनः श्रम स्वीकृति लिनेको संख्या २३ हजार ६ सय ४४ रहेको छ । गत वर्षको सोही अवधिमा यस्तो संख्या क्रमशः ३६ हजार ९ सय २८ र २२ हजार ६ सय ४७ रहेको थियो ।

यस्तै, गत साउनमा चालु खाता ७८ अर्ब १४ करोडले बचतमा छ । गत वर्षको सोही अवधिमा चालु खाता ३३ अर्ब ८ करोडले बचतमा रहेको थियो । अमेरिकी डलरमा अघिल्लो वर्षको सोही अवधिमा २५ करोडले बचतमा रहेको चालु खाता समीक्षा अवधिमा ५६ करोडले बचतमा रहेको राष्ट बैंकले जनाएको छ ।

चालु आर्थिक वर्षको पहिलो महिनामा शोधनान्तर स्थिति ८९ अर्ब ३० करोडले बचतमा छ । गत वर्षको सोही अवधिमा शोधनान्तर स्थिति ४० अर्ब ९० करोडले बचतमा रहेको थियो । ‘अमेरिकी डलरमा अघिल्लो वर्षको सोही अवधिमा ३१ करोडले बचतमा रहेको शोधनान्तर स्थिति समीक्षा अवधिमा ६४ करोडले बचतमा रहेको छ,’ राष्ट्र बैंकको गत साउनको प्रतिवेदनमा उल्लेख छ ।

यस्तै, गत साउनसम्म विदेशी विदेशी मुद्रा सञ्चिति २८ खर्ब ६ अर्ब ४ करोड पुगेको छ । ०८२ असार मसान्तमा यस्तो सञ्चिति २६ खर्ब ७७ अर्ब ६८ करोड बराबर रहेको थियो । ‘अमेरिकी डलरमा यस्तो सञ्चिति २०८२ असार मसान्तमा १९ अर्ब ५० करोड रहेकोमा २०८२ साउन मसान्तमा २.७ प्रतिशतले वृद्धि भई २० अर्ब ३ करोड पुगेको छ,’ प्रतिवेदनमा भनिएको छ ।

आर्थिक वर्ष २०८२/८३ को पहिलो महिनाको आयातलाई आधार मान्दा बैंकिङ क्षेत्रसाग रहेको विदेशी विनिमय सञ्चिति २०.४ महिनाको वस्तु आयात र १६.६ महिनाको वस्तु तथा सेवा आयात धान्न पर्याप्त रहने राष्ट बैंकको दाबी छ । यस वर्ष राष्ट बैंकले ७ महिनाको आयात धान्न सक्ने विदेशी मुद्रा सञ्चिति कायम गर्ने लक्ष्य तय गरेको छ ।

मुद्रास्फीति

वार्षिक बिन्दुगत उपभोक्ता मूल्य वृद्धि दर: १.६८% (गत वर्ष ४.०९%)
खाद्य तथा पेय पदार्थ: २.२८% (गत वर्ष ६.१७%)
गैर–खाद्य तथा सेवा: ३.९५% (गत वर्ष २.९४%)

खाद्य उप–समूह (वार्षिक बिन्दुगत परिवर्तन):
घ्यू तथा तेल: +१०.९७%
गैर–मदिराजन्य पेय पदार्थ: +४.६४%
फलफूल: +३.०१%
तरकारी: −१८.५६%
मसला: −४.८१%
माछा तथा मासु: −२.४१%

गैर–खाद्य तथा सेवा उप–समूह (वार्षिक बिन्दुगत परिवर्तन):
विविध वस्तु तथा सेवा: +१०.६०%
शिक्षा: +७.६७%
कपडा तथा जुत्ता–चप्पल: +६.८४%
फर्निसिङ तथा घरायसी उपकरण: +५.०६%
सुर्तीजन्य पदार्थ: +४.६८%
बीमा तथा वित्तीय सेवा: −०.२२%

(स्रोत: नेपाल राष्ट्र बैंक, मासिक प्रतिवेदन, साउन २०८२/८३)