काठमाडौं — प्रधानमन्त्री सुशीला कार्कीले पदभार सम्हालेपछि कर्मचारीलाई सम्बोधन गर्दै, जेनजी आन्दोलनका क्रममा भएको भौतिक तथा मानवीय क्षतिलाई सुनियोजित षड्यन्त्रको परिणाम भएको बताउनुभएको छ।

प्रधानमन्त्री कार्कीले भन्नुभयो , “यदि नेपालीले नै हत्या र हिंसा गरेका हुन् भने उनीहरूलाई नेपाली भन्न मिल्दैन। हत्या हिंसामा संलग्नहरूमाथि छानबिन हुन्छ। मुलुकका आधारभूत संस्थामाथि आगजनी गर्नेहरूमाथि कडा कारबाही हुन्छ।
म त्यत्तिकै प्रधानमन्त्री भएकी होइन। सडकबाट जिम्मेवारी लिनुपर्ने आवाज उठेपछि यो जिम्मेवारी आएको हो। अपरिहार्य संस्थामाथि प्रहार गर्नेहरूलाई छोडिँदैन।”

प्रधानमन्त्री कार्कीले आगामी दिनमा युवाहरूका मागअनुसार काम गर्ने प्रतिबद्धता व्यक्त गर्दै सरकारका सम्पूर्ण काम कारवाही छ महिनाभित्र पूरा गरेर नयाँ नेतृत्वलाई जिम्मेवारी हस्तान्तरण गर्ने घोषणा समेत गर्नुभएको छ।