काठमाडौं — नेपालमा हालै भएको “जेनजी” प्रदर्शनको क्रममा देशभर ३०० भन्दा बढी स्थानीय सरकारी कार्यालयहरुमा आगजनी, लुटपाट र तोडफोड भएको तथ्याङ्क सार्वजनिक भएको छ। यधपी, घटना र क्षयतिको यकिन विवरण भने अझै आइसकेको छैन।

देशका ६ महानगरपालिकामध्ये विराटनगर, वीरगन्ज, पोखरा र भरतपुरको कार्यालय जलेर ध्वस्त हुँदा काठमाडौं र ललितपुर तुलनात्मक रुपमा प्रायः सुरक्षित देखिएका छन्। प्रभावित क्षेत्रका दैनिक प्रशासनिक काम ठप्प भएका छन्।

संघीय मामिला तथा सामान्य प्रशासन मन्त्रालयका अनुसार २०० भन्दा बढी महानगर, उपमहानगर र नगरपालिका कार्यालय क्षतिग्रस्त भएका छन्। विशेषगरी शहरी क्षेत्र बढी प्रभावित भएका छन् र पूर्वको झापाबाट पश्चिमको कञ्चनपुरसम्म क्षति फैलिएको छ। प्रारम्भिक तथ्यांकअनुसार नगरपालिका गाउँपालिका भन्दा बढी प्रभावित भएका छन्, २९ वटा गाउँपालिकामा आगजनी वा तोडफोड भएको छ, जसमा १८ पूर्ण रूपमा र ११ आंशिक रूपमा क्षतिग्रस्त छन् । केही गाउँपालिकाका अध्यक्ष र प्रतिनिधिको निजि घरमा पनि आगजनी र तोडफोड भएको छ।

पोखरामा ३३ वटामध्ये २६ वडा कार्यालय क्षतिग्रस्त भएका छन्।
नौ वटा गाडी जलेको र महत्त्वपूर्ण उपकरण चोरी भएको बताइएको छ । भरतपुरको कार्यालय पनि जलेको छ। जसमा दमकल र फोहोर उठाउने गाडी जलाइएको छ । विराटनगर महानगरको चार तले भवन जलेर ध्वस्त भएको छ । वीरगन्ज महानगरपालिकाका ७ भवनमध्ये ३ वटा कामै नलाग्ने अवस्थामा छ भने अन्य भवनमा पनि आंशिक क्षति भएको छ । तर त्यहाँको ९५ प्रतिशत सामान जलेको र नजलेका सामान स्थानीयले लुटेर लगेका बताइएको छ ।

काठमाडौं उपत्यकामा पनि १८ वटा नगरपालिका र उपमहानगरमा व्यापक तोडफोड र आगजनी भएको छ। कीर्तिपुरमा छ तले भवन, १० गाडी र २२ भन्दा बढी मोटरसाइकल जले। गोकरणेश्वर, तारकेश्वर, दक्षिणकाली लगायतका वडाका कार्यालयमा आगजनी र तोडफोड भएको छ। तारकेश्वर नगरपालिकाको ५ वटा गाडी जलाएका छन् भने कार्यालय तोडफोड गरी कागजात जलाएका छन् । तारकेश्वरको वडा १, ४, १० र ११ मा आगजनी र तोडफोड गरेका छन् ।भक्तपुरको सूर्यविनायक र ललितपुरको महालक्ष्मी नगरपालिकामा पनि समान रूपमा क्षति भएको छ। केही क्षेत्रमा स्थानीयले आगजनीकर्तालाई रोक्न सफल भए पनि कार्यालय सञ्चालन भने सम्भव नदेखिएको बताइएको छ ।

मन्त्रालयका अधिकारीहरूको प्रारम्भिक तथ्यांक अनुसार सबै प्रदेशमा तोडफोड र आगजनीको कारण आवश्यक सरकारी सेवाहरू ठप्प भएका छन्।