वासिङ्टन – अमेरिकी राष्ट्रपति डोनाल्ड ट्रम्पले आफू रूसविरुद्ध कडा प्रतिबन्ध लगाउन तयार रहेको तर त्यसका लागि सबै नाटो सदस्य राष्ट्रहरूले सामूहिक रूपमा कदम चाल्नुपर्ने र रूसी तेल खरिद तत्काल रोक्नुपर्ने बताएका छन्।

आफ्नो ट्रुथ सोसल पेजमा लेख्दै उनले नाटोका सदस्यहरूले अझै पनि रूसी तेल आयात गरिरहेको भन्दै यसलाई “आश्चर्यजनक” भनेका छन् र यसले नाटोको वार्ताको क्षमता कमजोर बनाएको दाबी गरेका छन्। उनले भने , “म तयार छु, जब तपाईं तयार हुनुहुन्छ। केवल मिति भन्नुहोस्।”

ट्रम्पले नाटो सदस्यहरूलाई चीनमाथि ५० देखि १०० प्रतिशतसम्मको शुल्क (ट्यारिफ) लगाउन आग्रह गरेका छन्। उनका अनुसार यस्तो कदमले युक्रेन युद्धलाई अन्त्य गर्न मद्दत गर्नेछ र शान्तिपूर्ण समाधान भएपछि मात्र शुल्क फिर्ता लिन सकिनेछ।

युक्रेन युद्धलाई ट्रम्पले फेरि “बाइडेन र जेलिन्स्कीको युद्ध” बताएका छन् । उनले भने, “यदि नाटोले मेरो भनाइअनुसार गरे युद्ध छिट्टै अन्त्य हुन्छ र असंख्य जीवन बचाइनेछ। नभए तपाईंहरूले मेरो मात्र होइन, संयुक्त राज्य अमेरिकाको समय, ऊर्जा र धन खेर फाल्दै हुनुहुन्छ।”