काठमाडौं – सरकारले प्रतिनिधिसभा विघटन गरी आगामी फाल्गुन २१ गते निर्वाचन गर्ने निर्णय गरे सँगै निर्वाचन आयोगले तयारी सुरु गरेको छ।

कार्यवाहक प्रमुख निर्वाचन आयुक्त रामप्रसाद भण्डारीले आवश्यक स्रोतसाधन सरकारले उपलब्ध गराए आयोग छिट्टै निर्वाचन गराउन तयार रहेको बताएका छन् । उनका अनुसार सामान्यतया निर्वाचन गर्न कम्तीमा १२० दिन लाग्ने भए पनि आयोगले ६ महिनाभित्र निर्वाचन सम्पन्न गराउन सक्ने अवस्था छ।

भण्डारीले व्यवस्थापन र मतदाता नामावली अद्यावधिकको काम अघि बढिसकेको उल्लेख गरे। उनले भने, “स्रोतसाधन जुटाउनेबित्तिकै आयोगलाई निर्वाचन गराउन कुनै समस्या छैन।”

उनका अनुसार निर्वाचन घोषणा पत्र प्रधानमन्त्री तथा राष्ट्रपति कार्यालयबाट आएपछि गृह मन्त्रालयको समन्वयमा बाँकी प्रक्रिया अघि बढ्नेछ। उनले थपे, “आयोगले गृह मन्त्रालयमार्फत सरकारसँग सम्पर्क गर्छ। गृहमन्त्री आएपछि सल्लाह हुन्छ, निर्देशन अनुसार अघि बढ्छौं। तर स्रोतसाधन जुट्नेबित्तिकै आयोग अगाडि बढ्छ।”

भण्डारीले राष्ट्रिय सभाका एकतिहाइ सदस्यको कार्यकाल माघ दोस्रो सातासम्म सकिने भएकाले सोभन्दा ३५ दिनअघि नै निर्वाचन सम्पन्न गर्नुपर्ने अवस्था रहेको पनि बताएको छ । उनका अनुसार प्रतिनिधिसभा र राष्ट्रिय सभाको निर्वाचन क्रमश : अगाडि बढाइनेछ।