काठमाडौँ- बलियो कानुनी पृष्ठभूमि, राजनीतिक सूझबुझ र परिपक्वताले गर्दा “जेन जी” पुस्ताले देशको प्रधानमन्त्रीको रुपमा सिफारिस गरेको र आज नेपालको राजनीतिक वृतमा निकै चर्चा र बहसको पात्र बनेकी सुशीला कार्की नेपालको पहिलो महिला प्रधानन्यायधिस हुन्।

वि.स.२००९ जेठ २५ गते मोरङ, विराटनगरको शङ्खरपुरमा जन्मिएकी कार्की सात सन्तानमध्ये ज्येष्ठ छोरी हुन्। किसान परिवारको पृष्ठभूमिबाट आएकी कार्कीको बीपी कोइरालाको परिवारसँग नजिकको सम्बन्ध रहेको बताइन्छ।उनका पति दुर्गा सुबेदी प्रजातान्त्रिक सेनानी हुन्।

कार्कीले महेन्द्र मोरङ क्याम्पसबाट २०२८ सालमा बीए, २०३१ मा बनारस हिन्दू विश्वविद्यालयबाट राजनीतिशास्त्रमा एमए, र २०३४ मा त्रिभुवन विश्वविद्यालयबाट कानुनमा स्नातक गरेकी थिइन्। उनले आफ्नो करिअर शिक्षणबाट सुरु गरेकी थिइन् र २०४२ देखि २०४६ सम्म महेन्द्र बहुमुखी क्याम्पस, धरानमा प्राध्यापन गरेकी थिइन् ।

कार्की २०७३ असार २७ गतेदेखि २०७४ जेठ २४ गतेसम्म नेपालको प्रथम महिला प्रधानन्यायाधीशको जिम्मेवारीमा रहेकी थिइन्। प्रधानन्यायाधीश पदमा रहेर उनले निस्पक्ष र सन्तुलित भूमिका निर्वाह गरेकोले ,धेरैले उनलाई निर्भीक न्यायमूर्तिका रूपमा पनि चिन्ने गरेका छन्।

प्रधानन्यायाधीश बनेको १० महिनापछि तत्कालीन सत्तारुढ दल माओवादी र कांग्रेसले कार्कीले क्षेत्राधिकार नाघेर फैसला गरेको भन्दै उनीविरुद्ध महाअभियोग दर्ता गरेका थिए । तर, त्यो सफल भएन । महाअभियोगविरुद्ध अदालतमा रिट परेपछि तत्कालीन न्यायाधीश चोलेन्द्र शम्शेरले त्यसलाई रोक्न अन्तरिम आदेश गरेका थिए ।