काठमाडौं – जेनजी आन्दोलनका क्रममा भएको आगजनी र लुटपाटमा संलग्नहरूलाई कारबाही गर्न नेपाल प्रहरीले सर्वसाधारणलाई प्रमाण उपलब्ध गराउन आग्रह गरेको छ।

प्रहरीले काठमाडौं उपत्यकासहित देशभर भएका विरोध प्रदर्शन र आन्दोलनका क्रममा घटेका आगजनी, लुटपाट र आम सर्वसाधारणमा त्रास फैलाउने घटनासँग सम्बन्धित तस्बिर, भिडियो वा सामाजिक सञ्जालका लिङ्क उपलब्ध गराउन अनुरोध गरेको हो। प्रमाणहरू नेपाल प्रहरीको आधिकारिक इमेल [email protected] मा पठाउन सकिने र प्रमाणदाताको गोपनीयता कायम राखिने स्पष्ट गरिएको छ।

भदौ २३ र २४ मा भएका जेनजी प्रदर्शनका क्रममा सार्वजनिक तथा निजी सम्पत्तिमा क्षति पुगेको, नगद, गरगहना र सामानहरूको लुटपाट भएको प्रहरीको भनाइ छ। प्रदर्शनमा प्रहरीका कार्यालय र व्यारेकमै तोडफोड र आगजनी हुनुका साथै हतियार, पोशाकदेखि मेसमा रहेका दालचामलसम्म लुटिएको प्रहरीले जनाएको छ।

प्रहरीले यसअघि गत चैत १५ मा भएको राजावादी प्रदर्शनमा उच्छृंखल गतिविधि गर्ने अधिकांश व्यक्तिहरूको पहिचान गरी पक्राउ गरेको उल्लेख गर्दै जेनजी आन्दोलनमा संलग्न दोषीहरूलाई पनि कानुनी कारबाही गर्ने चेतावनी दिएको छ।