तपाइँले जित्नुभयो , हामीले जित्यौँ। तर तपाइँ हाम्रो मेहनत र पसिनाको कमाइबाट बनाइएका सार्वजनिक सम्पतिमाथिको तोडफोड र आगजनी बन्द गरौँ।

नेपालमा निर्दोष युवाहरुको रगत बगेपछि आज हामी सबैले एउटा ठूलो सत्य देख्यौं, तानाशाही शासन टिक्दैन। निर्दोष युवामाथि गरेको गोलीकाण्डले अन्ततः केपी ओली सरकारको अन्त्य भएको छ।

“जेन जी” पुस्ताले सुरु गरेको भ्रष्टाचार विरोधी आन्दोलनमा २० जना अवोध नेपाली नागरिकले ज्यान गुमाएपछि आक्रोशित बनेको भिडले नेतालाई घिसारेर सडकसम्म ल्याए र संसद भवन र सिंहदरबार देखि राष्ट्रपति कार्यालयसम्म आगो लगाइदिए। हुन त जनताकै करले बनेको राज्यको सम्पतिमा गरिएको आगजानी र तोडफोड सहि पक्कै पनि थिएन। तर आफ्नै साथी ,भाइ-बहिनि र छोरा छोरी गुमाएका जनताको क्रोध कस्तो हुँदो रहेछ भन्ने सबैले देखे।

भ्रष्टाचार अन्त्य गर, देशमै सुख संग बाच्न पाउने अधिकारको सुनिस्चितता गर भनेर स्वस्फुर्त रुपमा सडकमा निस्किएका बिद्यार्थी र नाति पुस्ताका नागरिक माथि राज्यले गोलि दागेर दमन गर्दा, अब जनता मौन बस्दैनन्, अब जनता डराउँदैनन् र अब उनीहरु प्रतिकारमा उत्रिन्छन र जब छोराछोरीको रगत बग्छ, आमाबुबाको आँसु बग्छ, तब महल र कुर्सीको मूल्य शून्य हुन्छ भन्ने हामी सबैले देख्यौं।

सरकारले घोषणा गरेको राहतले छोरा छोरी गुमाएका आमाबुबाको हृदयलाई न शान्ति दिन सक्छ न त रित्तिएको काख र चिथोरिएको छातीलाई भरपाई दिन सक्छ। तर अब राज्यले आम नागरिकलाई न्याय दिनुपर्छ । गोली हान्ने प्रहरी र आदेश दिने शासकलाई कानुनी कठघरामा उभ्याउनुपर्छ। तर सार्वजनिक सम्पति भनेको तपाइँ हाम्रै पसिना र रगतले जोडेको सम्पती हो। त्यो कुनै अमुक नेता र कुनै राजनीतिक दलको सम्पती होइन। हिजो हामीले नै तिरेको करबाट बनेका हुन् र भोलि हामीले नै हाम्रा सन्ततिको लागि जगेर्ना गर्दै नासोको रुपमा सुम्पिने सम्पति हो। राज्यको सम्पती अर्थात तपाइँ हाम्रै सम्पती हो। देश बनाउने र यो देश बचाउने जिम्मेवारी तपाइँ हाम्रो काँधमा आएको छ।

अबको प्रश्न भनेको हामीले खोजेजस्तो र सोचेजस्तो देश कसरि बनाउने र मुलुकलाइ कुन बाटोमा लैजाने भन्ने हो ?

अब यो समय केवल आक्रोशको होइन, नयाँ भविष्य बनाउनको निम्ती पनि हो। “जेन जी” पुस्ताले देखाएको यो साहस र बलिदानलाई अब व्यर्थ जान दिनुहुन्न। उनीहरूले देखाएका आक्रोश, उनीहरुको आँसु र रगतले एउटा आशा जगाएको छ ,नयाँ नेपालको ढोका खोलिदिएको छ। बस अबको नयाँ नेपाल कस्तो र कसरि बनाउने त्यो सोच्ने समय आएको छ।

आज भ्रष्टहरुको सरकारको अन्त्य भएको छ। अब हाम्रो हातमा अवसर छ, यो देशलाई साँच्चिकै तपाइँ हामीले सोचेजस्तो बनाउने । त्यो नेपाल जहाँ न्याय, समानता र करुणा हुनेछ। जहाँ भविष्य रगतले होइन, सपना र विश्वासले लेखिनेछ। आजको आक्रोश, आँशु , रगत र पीडालाई शक्तिमा बदलेर यो देशको सुन्दर भविष्यको खाका कोर्ने बेला आएको छ। हिजो ठिक थिएन भनेर आज हामीले बगाएको आँशु र रगत भोलि अर्को पुस्ताले ठिक भएन भनेर हाम्रा सन्ततिलाई प्रश्न गर्ने ठाउँ हामीले अब भने दिनुहुँदैन।

र अन्त्यमा फेरी भन्छु तपाइँले जित्नुभयो , हामीले जित्यौँ। तर तपाइँ हाम्रो मेहनत र पसिनाको कमाइबाट बनाइएका सार्वजनिक सम्पतिमाथिको तोडफोड र आगजनी बन्द गरौँ। हामीले अब यो भुल्नुहुँदैन कि अब देशलाई सुरक्षीत निकास दिने जिम्मेवारी पनि तपाइँ हाम्रो नै हो।