बर्दिया – सशस्त्र प्रहरी बल र नेपाल प्रहरीले चालु आर्थिक वर्षको सुरुवाती दुइ महिनामा लागूऔषध ओसारपसारमा संलग्न एक महिलासहित ४६ जनालाई पक्राउ गरेको छ।

जिल्ला प्रहरी कार्यालय बर्दियाका अनुसार यस अवधिमा २७.०२ ग्राम ब्राउन सुगर र २.६९ ग्राम चरेस बरामद गरेका छन्।

भारतबाट तस्करी हुने लागूऔषध नियन्त्रण गर्न गत वर्ष स्थानीय प्रशासनको नेतृत्वमा खोजी अभियान सुरु गरेपछि लागु औषध कारोबारी पक्राउ पर्न थालेको प्रहरीले बताएको छ।

आर्थिक वर्ष २०७९/०८० मा तीन महिलासहित ९१ जना, आर्थिक वर्ष २०८०/०८१ मा पाँच महिलासहित २०७ जना र गत आर्थिक वर्षमा एक महिलासहित १२० जना पक्राउ परेका थिए, जो सबै ब्राउन सुगर तस्करीमा संलग्न थिए।