काठमाडौँ– नेपाल र चीन सरकारबीच सहमति भएपछि मुस्ताङको उत्तरपश्चिममा पर्ने कोरला नाका पहिलोपटक व्यावसायिक प्रयोजनका लागि खोलिने भएको छ।

यसअघि मौसमी रूपमा मात्र खोलिँदै आएको कोरला नाका पहिलोपटक व्यावसायीक प्रयोजनका लागि खोलिने भएको हो । मनसुनको बाढीका कारण रसुवा–गढी र तातोपानी नाकाहरू लामो समयदेखि अवरुद्ध भएका कारण यो नाका विकल्पका रूपमा प्रयोग हुने भएको छ ।

भन्सार विभागका महानिर्देशक श्याम प्रसाद भण्डारीले आवश्यक पूर्वाधार तयार गरिएको र प्रारम्भिक चरणमा चार जना कर्मचारीलाई खटाइएको जानकारी दिएका छन् । उनले सोमबारदेखि क्वारेन्टिन नपर्ने सामान भित्र्याउन अनुमति दिने र क्वारेन्टिन सुविधा नभएकाले हाल कपडा, इलेक्ट्रोनिक सामानजस्ता वस्तु मात्रै ल्याउन पाइने उनले बताएका छन्।

हाल रसुवा–गढी अवरुद्ध हुँदा चीनको केरुङमा सयौँ कन्टेनर अड्किएका छन्। ती कन्टेनरलाई अब कोरलामार्फत ल्याइने सम्भावना बढेको छ। तर नेपालतर्फको मुस्ताङ मार्ग साँघुरो र जीर्ण भएको कारण ठूलो गाडी सहजै आवतजावत गर्न सक्ने अवस्था भने छैन। चीनतर्फ भने दुई लेनको पक्की सडक र आधुनिक भन्सार कार्यालय तयार भइसकेको छ।

चाडबाड नजिकिँदै गर्दा व्यापारीहरूले कपडा, इलेक्ट्रोनिक वस्तु आदि हवाई र समुद्री मार्ग हुँदै आयात गर्न थालेका छन्, तर ती विकल्प निकै महँगा छन्। यस्तो अवस्थामा कोरला नाका सञ्चालनमा आउनु व्यापारी र उपभोक्ताका लागि ठूलो राहत हुने देखिन्छ।