काठमाडौँ — ‘कलिसन अफ द विलिङ’ भनेर चिनिने पश्चिमी सहयोगीहरूले युक्रेनलाई लामो दूरीका हतियार उपलब्ध गराउने तयारी गरेको लण्डनले बिहीबार जारी गरेको विज्ञप्तिमा उल्लेख गरिएको छ। सदस्य राष्ट्रका नेताहरूबीच भएको भर्चुअल बैठकपछि जारी गरिएको उक्त विज्ञप्तामा कुन देशले कुन किसिमका हतियार दिने भन्नेबारे भने खुलाइएको छैन।

बेलायती प्रधानमन्त्री कियर स्टार्मरले सो बैठकमा हतियार आपूर्ति गर्ने प्रतिबद्धतालाई स्वागत गरेका छन्। फ्रान्सका राष्ट्रपति इमानुएल माक्रोनले पनि केही युरोपेली राष्ट्रहरू शान्ति सम्झौता भएपछि युक्रेनलाई सुरक्षा ग्यारेन्टी दिन तयार रहेको बताएका छन्।

जर्मन चान्सलर फ्रेडरिक मर्जले यसअघि ५०० किलोमिटर दायरासम्म प्रहार गर्न सक्ने टौरस मिसाइल पठाउने सम्भावनाबारे छलफल गरेका थिए। बिहीबारै रुसको वैदेशिक गुप्तचर सेवाले जर्मनीले पहिचान चिन्ह हटाएर युक्रेनलाई टौरस मिसाइल पठाउने गुप्त तयारी गरेको आरोप लगाएको छ। साथै, ती मिसाइल सञ्चालन गर्न आवश्यक तालिम दिन लामो समय लाग्ने भएकाले जर्मन सैनिकहरूले नै प्रहार गर्ने सम्भावना रहेको दाबी गरेको छ।

रुसले बारम्बार पश्चिमी हतियार आपूर्तिले युद्धलाई लम्ब्याउने भन्दै आपत्ति जनाउँदै आएको छ। राष्ट्रपति भ्लादिमिर पुटिनले युक्रेनलाई पश्चिमी सैन्य सहयोग रोक्नु नै युद्धविरामका लागि रुसको प्रमुख सर्त हुने बताएका छन्।