तियानजिन- चिनियाँ राष्ट्रपति सी चिनफिङले तियानजिनमा भइरहेको शाङ्घाई सहयोग संगठन (एससीओ) शिखर सम्मेलनमा नयाँ ‘वैश्विक शासनको पहल’ अघि सारेका छन्।

“म वैश्विक शासन पहल अघि सार्न चाहन्छु र सबै मुलुकसँग मिलेर मानवजातिको साझा भविष्य निर्माण गर्ने, अझ न्यायसंगत र समान अन्तर्राष्ट्रिय प्रणाली बनाउन चाहन्छु,” राष्ट्रपति सीले विस्तारित बैठकमा भने।

उक्त पहलअनुसार, मुलुक सानो वा ठूलो, बलियो वा कमजोर, धनी वा गरिब जे भए पनि सबैलाई समान सहभागिता र अवसर सुनिश्चित गर्नुपर्ने बताइएको छ। “हामीले अन्तर्राष्ट्रिय सम्बन्धलाई लोकतान्त्रीकरण गर्नुपर्छ र विकासशील मुलुकहरूको प्रतिनिधित्व र आवाजलाई मजबुत बनाउनुपर्छ,” सीले जोड दिए।

चिनियाँ नेताले अन्तर्राष्ट्रिय कानुनको सिद्धान्त पालना गर्नुपर्ने र दोहोरो मापदण्ड तथा कुनै देशले आफ्नो आन्तरिक नीतिलाई अरूमाथि थोपर्ने अभ्यास अस्वीकार्य भएको उल्लेख गरे।

उनले वैश्विक शासन परामर्श, स्रोतको साझेदारी र सामूहिक निर्णयमा आधारित हुनुपर्ने बताए। यसले सबै मुलुकले लाभ लिन सक्ने वातावरण सिर्जना गर्ने र उत्तर-दक्षिणबीचको विकास अन्तर घटाउने लक्ष्य राखिएको छ।

तियानजिनमा चलेको एससीओ शिखर सम्मेलनमा रुसी राष्ट्रपति भ्लादिमिर पुटिन,उत्तर कोरियाली नेता किम, भारतीय प्रधानमन्त्री मोदी र २० भन्दा बढी देशका राष्ट्रप्रमुख र १० अन्तर्राष्ट्रिय संस्थाका प्रतिनिधिहरू सहभागी छन्।